საქართველო იძულებული გახდა იყიდოს ბუნებრივი აირი რუსეთის ფედერაციისგან მომდევნო რამდენიმე დღის ან კვირის განმავლობაში, ვინაიდან გაუთვალისწინებელი ავარიის შედეგად შეჩერდა ბუნებრივი აირის მოპოვება აზერბაიჯანის მთავარ საბადოზე, განაცხადა დღეს საქართველოს პრემიერ-მინისტრმა ზურაბ ნოღაიდელმა.
გასულ წელს რუსეთმა ორჯერ გააძვირა საქართველოსთვის მოწოდებული ბუნებრივი აირი, წელს კი განაცხადა, რომ 2007 წლისთვის ფასები ისევ გაორმაგდება. ამის საპასუხოდ საქართველოს მთავრობამ დაიწყო მიზანმიმართული ენერგოდივერსიფიკაციის პოლიტიკის გატარება, რომლის ნაწილსაც აზერბაიჯანიდან გაზის ალტერნატიული მოწოდების წარმატებით შენარჩუნება წარმოადგენს.
აზერბაიჯანის შაჰდენიზის საბადოზე მომხდარი ინციდენტი დროებითი შემაფერხებელი ფაქტორია დივერსიფიკაციის პოლიტიკის განხორციელების გზაზე. საქართველო გააფორმებს მოკლევადიან კონტრაქტს საჭირო რაოდენობის რუსული გაზის შესყიდვაზე, რომლის ხანგრძლივობა შაჰდენიზიდან გაზის მოწოდების აღდგენამდე გაგრძელდება.
ბუნებრივი აირი შაჰდენიზის საბადოდან, რომლის ტრანზიტსაც ახდენს საქართველო, წარმოადგენს ენერგორესურსების მთავარ წყაროს თურქეთისთვის და სხვა მრავალი ევროპული სახელმწიფოსთვის და იმავდროულად წარმოადგენს რუსეთის გაზის ერთადერთ ალტერნატივას.
საქართველო სავარაუდოდ 235 აშშ დოლარს გადაიხდის ათას კუბურ მეტრ რუსულ აირში.
საქართველოს მთავრობის კანცელარიის პრესცენტრი