საინვესტიციო საქმიანობის ხელშეწყობის მიზნით რიგ ღონისძიებათა განხორციელების შესახებ
1. საქართველოს მთავრობა, აღიარებს რა, რომ ინვესტიციების წახალისება და საინვესტიციო გარემოს დაცვა ხელს უწყობს ეკონომიკური ურთიერთობების განვითარებისა და საინვესტიციო ინიციატივების სტიმულირებას, ,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ" საქართველოს კანონის მე-5 მუხლის ,,ზ" და ,,თ" ქვეპუნქტების, საქართველოს სამოქალაქო კოდექსის 245-ე მუხლის მე-5 ნაწილისა და საქართველოს ზოგადი ადმინისტრაციული კოდექსის 71-ე მუხლის შესაბამისად, სახელმწიფო ქონების შემძენთა მიერ ხელშეკრულებით ნაკისრი ვალდებულებების შესრულების, ასევე ინვესტიციების განხორციელების (საინვესტიციო საქმიანობა) ხელშეწყობის მიზნით კონტრაჰენტებს (ინვესტორები) და იმ საჯარო სამართლის იურიდიულ პირებს, რომლებსაც სახელმწიფო ქონება გადაცემული აქვთ უზუფრუქტის ფორმით ბოლო დროს განხორციელებული საკანონმდებლო ცვლილებების, ასევე საინვესტიციო გარემოს შეცვლის ან/და დაუძლეველი ძალის არსებობის გამო, საჯარო და კერძო ინტერესების პროპორციულობის დაცვის პრინციპზე დაყრდნობით, შეეცვალოთ სახელმწიფოს წინაშე შესასრულებელი ვალდებულებები და მოეხსნათ დაკისრებული სანქციები, კერძოდ:
ა) რუსეთის ფედერაციის სამხედრო აგრესიის შედეგად ოკუპირებულ ტერიტორიებზე მოქცეული უძრავი და მოძრავი ნივთის შემძენები გათავისუფლდნენ მათზე ხელშეკრულებით ნაკისრი შეუსრულებელი ვალდებულებების გამო დღემდე დაკისრებული პირგასამტეხლოს თანხის გადახდისაგან და გადაევადოთ ვალდებულებების შესრულება ოკუპირებულ ტერიტორიებზე საქართველოს იურისდიქციის სრულად აღდგენამდე;
ბ) საჯარო სამართლის იურიდიული პირები, რომლებსაც სახელმწიფო ქონება გადაცემული აქვთ უზუფრუქტის ფორმით და ვალდებულნი იყვნენ დაეზღვიათ აღნიშნული ქონება, მაგრამ ვალდებულება არ აქვთ შესრულებული, გათავისუფლდნენ დაკისრებული პირგასამტეხლოს გადახდისა და ქონების დაზღვევის ვალდებულებისაგან.
2. საქართველოს ეკონომიკური განვითარების სამინისტრომ განახორციელოს ამ განკარგულების შესრულებისათვის აუცილებელი ღონისძიებები.
პრემიერ-მინისტრი ნიკა გილაური