2011 წლის 18-19 ნოემბერს ბათუმში საქართველო-სომხეთის ეკონომიკური თანამშრომლობის მთავრობათაშორისი კომისიის სხდომა გაიმართა.
18 ნოემბერს საქართველოს პრემიერ-მინისტრი ნიკა გილაური ბათუმში კომისიის სხდომაში მონაწილეობის მისაღებად ჩამოსულ სომხეთის რესპუბლიკის პრემიერ-მინისტრს ტიგრან სარგსიანს შეხვდა.
შეხვედრის შემდეგ საქართველოს პრემიერ-მინისტრმა აღნიშნა, რომ „სომხეთი არის საქართველოს ერთ-ერთი მთავარი პარტნიორი."
„ჩვენ შორის სავაჭრო ბრუნვა გაიზარდა 40%-ით. სომხეთიდან საქართველოში ჩამოდის ტურისტების ყველაზე დიდი რაოდენობა. გვაქვს ძალიან კარგი პოლიტიკური ურთოერთობა და ძალიან მნიშვნელოვანი ეკონომიკური ურთიერთობა. (შეხვედრაზე) ვილაპარაკეთ რამოდენიმე ენერგეტიკულ პროექტზე, სატრანზიტო პესრპექტივებზე, ტრანსპორტზე," - აღნიშნა ნიკა გილაურმა.
19 ნოემბერს, საქართველო-სომხეთის ეკონომიკური თანამშრომლობის მთავრობათაშორისი კომისიის სხდომის მსვლელობისას მხარეებმა სავაჭრო, ეკონომიკური, სატრანსპორტო, კომუნიკაციების, ტურიზმის, საბაჟო და სხვა სფეროებში თანამშრომლობის საკითხები განიხილეს. პლენარული სხდომის შემდეგ საქართველო-სომხეთის ერთობლივი მთავრობათაშორისი ეკონომიკური კომისიის ოქმის ხელმოწერის ცერემონიალი გაიმართა.
"დიდი მადლობა მინდა გადავუხადო ყველას, ვინც ამ ოქმზე ორი თვის განმავლობაში მუშაობდა. სომეხმა და ქართველმა ექსპერტებმა კარგად იმუშავეს. ოქმში 19 სხვადასხვა ტიპის საკითხია ჩადებული: ეკონომიკური, სოციალური, ორმხრივი პროექტები, ეკონომიკური პროექტები...
რაც შეეხება საბაჟო საკითხებს, საუბარია საბაჟოი ერთობლივ მართვაზე. ასეთი პროექტი უკვე განვახორციელეთ სარფში, თურქეთის საზღვარზე. ძალიან ეფექტურია, ორჯერ უფრო ნაკლები დრო ესაჭიროება ადამიანს საზრღვრის გადასასვლელად და საბაჟო პროცედურების გავლისთვის. ასეთივე პროექტს ვახორციელებთ სომხეთის საზღვარზე," - განაცხადა საქართველოს პრემიერ-მინისტრმა საქართველო-სომხეთის ერთობლივი მთავრობათაშორისი ეკონომიკური კომისიის ოქმის ხელმოწერის შემდეგ.
პრემიერ-მინისტრის პრესსამსახური