14-16 იანვარს საქართველოს პრემიერ-მინისტრი ვლადიმერ გურგენიძე ვიზიტით ავსტრიის რესპუბლიკაში იმყოფებოდა.
ვიზიტის ფარგლებში საქართველოს პრემიერ-მინისტრი შეხვდა ეუთოს გენერალურ მდივანს მარკ პერინ დე ბრიშამბოს. მას ვლადიმერ გურგენიძემ მიაწოდა ინფორმაცია საქართველოში ჩატარებული პრეზიდენტის რიგგარეშე არჩევნების შედეგებისა და პარლამენტის არჩევნებისათვის მზადების შესახებ. ილაპარაკეს აგრეთვე კონფლიქტების გადაწყვეტისა და სხვა აქტუალურ საკითხებზე.
საქართველოს დელეგაციამ აქტიური მონაწილეობა მიიღო ჟურნალ ,,ევრომანის" კონგრესის მუშაობაში, რომელიც ყოველწლიურად იმართება და წარმოადგენს ძალზე პრესტიჟულ ღონისძიებას აღმოსავლეთ ევროპის ქვეყნებით დაინტერესებული ინვესტორებისა და ბანკირებისათვის.
კონგრესი, რომელსაც 1200 დელეგატი ესწრებოდა, გაიხსნა საქართველოს პრემიერ-მინისტრის მოხსენებით. დელეგატებს მიეწოდათ ინფორმაცია საქართველოში გამართული პრეზიდენტის არჩევნების, აგრეთვე იმ პროცესების თაობაზე, რომლებიც ქვეყანაში განვითარდა ბოლო ორი-სამი თვის განმავლობაში. მაგრამ მთავარი, რასაც განსაკუთრებული ყურადღება მიექცა, იყო პერსპექტივები.
- ,,ყველა ინვესტორი თუ დასავლეთის ბანკების წარმომადგენლები, ვისაც შევხვდით, კმაყოფილი დარჩნენ იმ საკანონმდებლო პაკეტით, რომელიც გასულ კვირას საქართველოს პარლამენტში შევიტანეთ. მათ მიაჩნიათ, რომ ეს არის მართლაც უპრეცედენტო პაკეტი, რომელშიც სრული მოცულობით არის გათვალისწინებული ინვესტორთა სადღეისო ინტერესი და გარანტია, რომ რადიკალური ეკონომიკური რეფორმების კურსი გაგრძელდება გამართული არჩევნების შედეგებიდან გამომდინარე", - განაცხადა საქართველოს პრემიერ-მინისტრმა.
საქართველოს მთავრობის კანცელარიის პრესცენტრი