სხდომის დაწყებისას საქართველოს პრემიერ-მინისტრმა ვლადიმერ გურგენიძემ განსაკუთრებით აღნიშნა ის თანადგომა, რომელიც დღეს საქართველოს მიმართ გამოხატეს საერთაშორისო ორგანიზაციებმა, კერძოდ, მსოფლიო ბანკმა და ევროპის განვითარებისა და რეკონსტრუქციის ბანკმა. ორივე ამ ორგანიზაციამ, ჩვენმა უდიდესმა დონორებმა და პარტნიორებმა მრავალი წლის განმავლობაში, თქვა მან, დღეს გაავრცელეს სათანადო განცხადებები. მაგალითად, მსოფლიო ბანკის რელიზში ნათქვამია, რომ მსოფლიო ბანკს სურს გამოხატოს თავისი რწმენა ქვეყნის ძლიერი ეკონომიკური საფუძვლების არსებობაში, რომ საქართველოს მთავრობა განაგრძობს ეკონომიკური მართვის ჯანსაღ კურსს და იგი კვლავაც დაუჭერს მხარს საქართველოს წამოწყებული რეფორმების განხორციელებაში. შეგახსენებთ, რომ წლების განმავლობაში მსოფლიო ბანკის მიერ საქართველოში ინვესტირებული ან ქვეყნისათვის გამოყოფილი თანხა ერთ მილიარდ დოლარს აღემატება. დღეისათვის ინვესტირებულია 135 მილიონი დოლარი. ბოლოს, ისინი თავიანთ რელიზში დასძენენ, რომ საქართველოს რეფორმების აღიარების ნიშნად მსოფლიო ბანკი განიხილავს ახალი კრედიტების გაცემას 300-350 მილიონი დოლარის ოდენობით, რათა მომდევნო 12 თვის განმავლობაში დაეხმაროს მთავრობას რეფორმების კურსის გაგრძელებასა და საქართველოს კრიტიკული ინფრასტრუქტურის რეალიზაციაში, რაც მოიცავს გზებს, მუნიციპალურ სამუშაოებს და ა.შ. ჩვენ ადრეც ბევრს ვსაუბრობდით ინფრასტრუქტურის თემატიკაზე. ბუნებრივია, ბევრი იყო გასაკეთებელი, შესაძლოა ახლა კიდევ უფრო მეტია, მაგრამ ამას ნამდვილად გავაკეთებთ. საქართველო დღეს ასრულებს და მომავალშიც შეასრულებს თავის რეგიონულ სატრანზიტო ფუნქციებს.
შემდეგ პრემიერ-მინისტრმა თქვა, რომ ევროპის განვითარებისა და რეკონსტრუქციის ბანკის განცხადებაში ხაზგასმულია, რომ ბოლო რამდენიმე წლის განმავლობაში საქართველოს ეკონომიკამ სწრაფი პროგრესი განიცადა რეფორმების კუთხით. საუბარია ჩვენი საბანკო სექტორის სიძლიერესა და დინამიზმზე. ბოლოს, ისინი აღნიშნავენ საკუთარ როლს საქართველოში ინფრასტრუქტურული პროექტების დაფინანსებაში. მრავალი ასეთი პროექტი განხორციელდა პორტებში, აეროპორტებში, წყალმომარაგების კომპანიებში, ენერგეტიკასა და მის დისტრიბუციაში, რკინიგზაში, საქალაქო ტრანსპორტსა და გზებზე. ბუნებრივია, ამ ძალიან მნიშვნელოვან ორგანიზაციასთან კიდევ უფრო ინტენსიურად ვიმუშავებთ. ეს არის ძალიან მნიშვნელოვანი, დროული განცხადებები და დიდი მადლობა მათ, თუმცა ვიტყვი, რომ საქართველომ ნამდვილად დაიმსახურა ასეთი თანადგომა იმ რეფორმებიდან გამომდინარე, რომლებიც განხორციელდა ჩვენს ეკონომიკაში ბოლო რამდენიმე წლის განმავლობაში.
რომ დავუბრუნდეთ ჩვენს სატრანსპორტო ლოგისტიკურ და სატრანზიტო ფუნქციებს, განაგრძო მან, ყველაფერი გამართულად მუშაობს. მცირე შეფერხებები იყო, მაგრამ ისინი დროულად და ეფექტიანად იქნა აღმოფხვრილი. პრემიერ-მინისტრმა კმაყოფილება გამოხატა რეაგირების სისწრაფის ხარისხით და აღნიშნა, რომ ფოთის პორტი დღეს მთელი დღის განმავლობაში ჩვეულებრივ რეჟიმში მუშაობდა, რამდენიმე გემი გადმოიტვირთა, კიდევ მრავალი გემი დგას რეიდზე, რომლებიც თავიანთ რიგს ელოდებიან.
აღნიშნული კომენტარიდან გამომდინარე, საქართველოს ეკონომიკური განვითარების მინისტრმა ეკა შარაშიძემ თქვა, რომ ფოთის პორტის ოპერირება სრულად აღდგენილია. იქ შევიდა 15 გემი, თითოეულ ნავმისადგომთან ორ-ორი გემი იდგა. დღეს მოხდა მათი სრულად გადმოტვირთვა და ჩატვირთვა. ასევე ოპერირებს ბათუმის პორტი, ხოლო ყულევის პორტი ელოდება ერთ-ერთ გემს ჩასატვირთად. გამართულად ოპერირებს რკინიგზა. ყველა ტვირთი, რომელიც იქნა გადმოზიდული პორტებიდან, მოძრაობს ჩვეულებრივ რეჟიმში. როგორც სამგზავრო, ასევე სატვირთო რკინგიგზა მუშაობს. ამ ეტაპზე რკინიგზაზე შეფერხებები არ არის. რაც შეეხება აეროპორტს, თქვენ იცით, რომ დღეს დილით ზიანი მიადგა სანავიგაციო რადარს თბილისის მახლობლად. ჩვენ მივიღეთ ზომები, რომ ჩაგვენაცვლებინა არსებული რადარი. გარდა ამისა, ორი სარეზერვო რადარი ჩავრთეთ, რომლებსაც ახლა ვიყენებთ და დაზღვეული ვართ, რომ სამოქალაქო ფრენებს შეფერხებები არ ექნება.
შემდეგ პრემიერ-მინისტრმა აღნიშნა, რომ საბაჟო უწყება მუშაობს, ტვირთების გადაადგილება ორივე მიმართულებით, ასევე სომხეთისა და აზერბაიჯანის მიმართულებით ჩვეულებრივ რეჟიმში ხდება. იგი დაინტერესდა ფინანსთა სამინისტროს მუშაობით, რაზეც ფინანსთა მინისტრმა ნიკა გილაურმა უპასუხა, რომ სამინისტროს ყველა სტრუქტურა შეუფერხებლად ფუნქციონირებს, მათ შორის, საგადასახადო, საბაჟო. ტვირთბრუნვა თითქმის იგივე დონეზეა, ოდნავ შემცირდა, რადგან გარკვეულწილად შემცირდა სატრანზიტო ტვირთბრუნვა. თურქეთისა და აზერბაიჯანის მიმართულებით, აქეთაც და იქითაც ხორციელდება საექსპორტო და საიმპორტო ტვირთების უპრობლემო გატარება.
შემდეგ საქართველოს პრემიერ-მინისტრი დაინტერესდა ჯანმრთელობის დაცვის სისტემაში არსებული მდგომარეობით.
საქართველოს შრომის, ჯანმრთელობისა და სოციალური დაცვის მინისტრმა ალექსანდრე კვიტაშვილმა დამსწრეთ მიაწოდა ინფორმაცია, რომ მათი კუთხით დიდი ცვლილება არ არის. გუშინდელთან შედარებით მცირედ მოიმატა დაჭრილების რაოდენობამ. საავადმყოფოები მუშაობენ მაქსიმალური დატვირთვით, ძალიან კარგად, რისთვისაც მან მადლობა გადაუხადა სამედიცინო პერსონალს. არის ერთი სირთულე, განაგრძო მინისტრმა. კერძოდ, ჩვენ ვერ ვახერხებთ შესვლას კონფლიქტის ზონაში, რათა კორიდორის მეშვეობით გამოვიყვანოთ დაჭრილები. რამდენიმე საერთაშორისო ორგანიზაციის მცდელობის მიუხედავად, მათ შორის წითელი ჯვრისა, რუსეთისაგან ვერ მივიღეთ თანხმობა კორიდორის გასახსნელად არათუ საქართველოს ტერიტორიიდან, არამედ ვლადიკავკაზიდანაც. გუშინ, დღის ორი საათიდან ჩვენი სამსახურები მობილიზებული იყვნენ საზღვარზე გორის რაიონის გაყოლებით, რომ შესულიყვნენ კონფლიქტის ზონაში, ველოდებოდით მათ თანხმობას, მაგრამ ეს არ მოხერხდა. აქედან გამომდინარე, ის ციფრი, რომელიც გუშინ დავასახელე, 94 დაღუპული ადამიანი, ისევ რჩება, რადგან სხვა ახალი მონაცემები არ მაქვს.
შემდეგ საქართველოს პრემიერ-მინისტრმა სთხოვა სოფლის მეურნეობის მინისტრს ბაკურ კვეზერელს ინფორმაციის წარმოდგენა სურსათით მომარაგების შესახებ.
სოფლის მეურნეობის მინისტრმა ბ.კვეზერელმა თქვა, რომ არანაირი შეფერხება არ არის როგორც წარმოების, ისე რეალიზაციის და სადისტრიბუციო ქსელების თვალსაზრისით. სურსათი სტაბილურად მიეწოდება ყველა სავაჭრო ობიექტს და შესაბამისად, მიმდინარეობს ვაჭრობა. პანიკის არანაირი საფუძველი არ გვაქვს, რადგან ყველაფერი შეუფერხებლად მიმდინარეობს.
საქართველოს პრემიერ-მინისტრმა მადლობა გადაუხადა მთავრობის წევრებს წარმოდგენილი ინფორმაციებისათვის.
საქართველოს მთავრობის კანცელარიის საორგანიზაციო დეპარტამენტი