2008 წლის 9 აგვისტოს გაიმართა საქართველოს მთავრობის სხდომა.
სხდომის დაწყებისას საქართველოს პრემიერ-მინისტრმა ვლადიმერ გურგენიძემ სთხოვა საქართველოს შრომის, ჯანმრთელობისა და სოციალური დაცვის მინისტრს ალექსანდრე კვიტაშვილს დამსწრეთ ინფორმირება კონფლიქტის რეგიონში დაღუპულთა რაოდენობის შესახებ.
საქართველოს შრომის, ჯანმრთელობისა და სოციალური დაცვის მინისტრმა ალექსანდრე კვიტაშვილმა დამსწრეთ აცნობა, რომ ამ დროისთვის დაღუპულია 55 კაცი, მათგან 15 მშვიდობიანი მოქალაქე და 40 სამხედრო მოსამსახურე. ძალზე შემაშფოთებელია ის, რომ განაგრძო მან, ბოლო, დაახლოებით 18 საათის განმავლობაში კონფლიქტის ზონის გარეთ დაზარალებულთა და დაღუპულთა რაოდენობა მატულობს. დაზარალებულების დიდი შემოდინება არის სენაკიდან და სხვა ადგილებიდან, სადაც მოხდა ავიადაბომბვა. დღეს დილით გორში ავიაშეტევის დროს განადგურდა სასწრაფო დახმარების პუნქტი, რომლის ერთი ექიმი, მძიმე მდგომარეობაში მყოფი, გადმოყვანილია თბილისში. წარმოუდგენელი შემთხვევაა, როცა პირდაპირი, მიზანმიმართული დარტყმა ხდება სამედიცინო ობიექტზე, რომელსაც აქვს შესაბამისი განმასხვავებელი ნიშანი. მინდა მადლობა გადავუხადო ექიმებს, რომლებიც ძალზე ეფექტიანად მუშაობენ, თუმცა, სამწუხაროდ, დაღუპულების რაოდენობა 55-ს შეადგენს.
საქართველოს პრემიერ-მინისტრის თხოვნით დამსწრეთ წუთიერი დუმილით პატივი მიაგეს დაღუპულთა ხსოვნას.
საქართველოს პრემიერ-მინისტრმა შრომის, ჯანმრთელობსა და სოციალური დაცვის მინისტრს სთხოვა მასმედიის საშუალებებით საზოგადოების პერიოდულად ინფორმირება დაღუპულთა და დაჭრილთა რაოდენობის შესახებ. მან ხაზგასმით აღნიშნა, რომ სამედიცინო სისტემა კარგად მუშაობს, თუმცა ამ ბოლო ორი დღის განმავლობაში ძალზე მძიმე გამოცდის წინაშე იმყოფება. პრემიერ-მინისტრმა მადლობა გადაუხადა მედიცინის დარგის მუშაკებს გამოჩენილი სამოქალაქო გმირობისათვის და იმედი გამოხატა, რომ თანდათან მოიკლებს როგორც დაღუპულთა, ისე დაჭრილთა რაოდენობა და ეს მალე მოხდება.
მან ასევე საგანგებოდ აღნიშნა შეიარაღებული ძალებისა და პოლიციის შენაერთების უპრეცედენტო გმირობა, ხაზი გაუსვა მათ გამძლეობას, სიმტკიცეს, პროფესიონალიზმს და მოტივაციას, რაც არაერთხელ გამოავლინეს ამ ბოლო ორი დღის განმავლობაში და უსურვა, რაც შეიძლება მალე მშვიდობითა და გამარჯვებით შინ დაბრუნება.
შემდეგ საქართველოს პრემიერ-მინისტრმა აღნიშნა, რომ დღეს მოვიწვიეთ მთავრობის სხდომა, რათა ვისაუბროთ საგანგებო რეჟიმსა და საომარ ვითარებაში განსახორციელებელ ღონისძიებებზე, რომლებიც აუცილებელია ქვეყნის ეკონომიკის ყველა რგოლის შეუფერხებლად მუშაობისათვის რუსეთის ფართომაშტაბიანი აგრესიის პირობებში. ჩვენი ენერგეტიკის სისტემა მუშაობს შეფერხებების გარეშე. ეს ეხება როგორც ელექტრო-, ისე გაზმომარაგებას. ბუნებრივია, გვაქვს სათანადო გათვლები და გეგმები, თუ როგორ ვიმოქმედოთ რუსეთის ბომბდამშენების მიერ ენერგეტიკის ინფრასტრუქტურის დაბომბვის შემთხვევაში. ჯერჯერობით ასეთი ფაქტები არ დაფიქსირებულა, თუმცა უკვე გვაქვს ინფორმაცია, რომ რუსეთის თვითმფრინავებმა დაბომბეს ჩვენი სტრატეგიული მილსადენები. მილსადენები დაზიანებული არ არის, მაგრამ მათ შორიახლოს ჩამოგდებულ იქნა ჭურვი, რაც იმას ნიშნავს რომ ისინი გადავიდნენ სტრატეგიული ობიექტების დაბომბვაზე. მილსადენს, მიუხედავად მისი გლობალური მნიშვნელობისა, არანაირი სამხედრო ტაქტიკური მნიშვნელობა არ აქვს. ეს არის კიდევ ერთი საკმაოდ მკაფიო ფაქტი იმ ბარბაროსული კამპანიისა, რომელიც რუსეთმა ჩვენ წინააღმდეგ დაიწყო. მინდა დაგარწმუნოთ, რომ ყველა ობიექტი მწყობრშია, მუშაობს, მთელი სისტემა მობილეზებულია და ჩვენ გვაქვს კონკრეტული გეგმები, თუ როგორ ვიმოქმედოთ ამ დარგის ობიექტების დაზიანების შემთხვევაში.
გუშინ მთელი დღის განმავლობაში ასევე შეფერხებების გარეშე მუშაობდა სატრანსპორტო სისტემა. იგი დღესაც გამართულად ფუნქციონირებს, გარდა იმ გამონაკლისისა, სადაც ფიზიკურად მოხდა სატრანსპორტო ინფრასტრუქტურის პატარა ნაწილისა თუ უბნის დაზიანება. ამის მცდელობა ნამდვილად იყო რუსეთის ავიაძალების მიერ და მოსალოდნელიც არის, ვერ გამოვრიცხავთ მათ კვლავ განმეორებას. სატრანსპორტო სისტემა მუშაობს, ხოლო დაზიანებული ინფრასტრუქტურა მაქსიმალურად მოკლე დროში იქნება შეკეთებული. ეკონომიკური განვითარების სამინისტრო და მისი შესაბამისი უწყებები ამუშავებენ გეგმებს, თუ რა უნდა გაკეთდეს ძალიან მოკლე დროში ამგვარი დაზიანებების მაქსიმალურად და ეფექტიანად აღმოსაფხვრელად.
შემდეგ საქართველოს პრემიერ-მინისტრმა ხაზგასმით აღნიშნა სოფლის მეურნეობის სამინისტროს, ეკონომიკური განვითარების სამინისტროსა და ფინანსთა სამინისტროს ეფექტიანი საქმიანობა, რომლის შედეგად შექმნილია ძირითადი სტრატეგიული საკვები პროდუქტებისა და სამოქალაქო მოხმარებისთვის განკუთვნილი საწვავის რამდენიმე თვის მარაგი. აუცილებელია, რომ ჩვენმა მოქალაქეებმა ამის შესახებ იცოდნენ. აღსანიშნავია, რომ გუშინ და დიდწილად დღეს არ ყოფილა პროდუქტების მასობრივი პანიკური შესყიდვები. დარწმუნებული ვარ, ასეც გაგრძელდება, რადგან პანიკის არავითარი საფუძველი არ არსებობს. მარაგები არის და თუ გაიხსენებთ ჩვენს სტრატეგიულ ადგილმდებარეობას, თუ დახედავთ რუქას, თუ გაითვალისწინებთ იმას, რაც ახლახანს მოგახსენეთ სატრანსპორტო ინფრასტრუქტურის მდგრადობის შესახებ, თავად დაასკვნით, რომ არა თუ პანიკის, არამედ არანაირი ეჭვის საფუძველიც კი არ არსებობს, რომ ეს მარაგები გამოილევა რამდენიმე დღის განმავლობაში. ამ მიმართულებით ეს სამი სამინისტრო ძალზე დაძაბულად მუშაობს.
დღევანდელ მთავრობის სხდომაზე განხილულ იქნება საკითხი საომარი ვითარების პირობებში განსაკუთრებული შესყიდვის რეჟიმის შესახებ, რომელსაც ფინანსთა მინისტრი ნიკა გილაური წარმოადგენს. ეს გათვალიწინებულია კანონით ,,საომარი მოქმედებების შესახებ". ფინანსთა სამინისტროს ექნება განსაკუთრებული უფლებები აწარმოოს შესყიდვები. ამისათვის პირველ ეტაპზე მთავრობის სარეზერვო ფონდიდან გამოყოფილ იქნება რვა მილიონი ლარი, ხოლო შემდგომ, თუ საჭირო იქნა, იმდენი, რამდენიც დაგვჭირდება.
იმ არაორდინალურ და მძიმე მდგომარეობაში, რომელშიც ვიმყოფებით, განსაკუთრებით აღნიშვნის ღირსია ის, რომ მიუხედავად საინფორმაციო ფონისა და ვითარებისა, რომელიც შეიქმნა, ეკონომიკური განვითარების სამინისტრომ კარგად იმუშავა და ამავდროულად, არ შენელებულა ინვესტორთა ინტერესი საქართველოს მიმართ. გუშინ საპრივატიზაციო აუქციონებზე გაიყიდა 14 სხვადასხვა ობიექტი, ასევე გაიყიდა გაკოტრების რეჟიმში მყოფი ერთი ობიექტი. ამ პრივატიზაციიდან შემოსულმა თანხამ 6 მილიონი დოლარი და 3 მილიონი ლარი შეადგინა.
კიდევ ერთი ფაქტი, ძალიან მნიშვნელოვანი, რომელიც ყველამ უნდა იცოდეს და სათანადოდ გაიაზროს. მინდა მადლობა გადავუხადო ფინანსთა სამინისტროს შესაბამის უწყებებს, მინისტრს, გუშინ დაფიქსირდა გადასახადების უპრეცედენტოდ მაღალი შემოდინება 24,7 მილიონი ლარის ოდენობით. ცნობისათვის, ტიპიურად საშუალო სამუშაო დღეს გადასახადების საშუალო შემოდინების დონე მერყეობს 15-20 მილიონი ლარის ფარგლებში. მაგალითად, აგვისტოს მშვიდობიან დღეებში გუშინდელისგან განსხვავებით, 17 მილიონ ლარზე მეტი არ შემოდიოდა. გუშინ 24,7 მილიონი ლარი შემოვიდა ანუ თითქმის 50%-ით მეტი. ფინანსთა სამინისტროს ყველა სტრუქტურა მობილიზებულია, 24-საათიან რეჟიმში მუშაობს ეფექტიანად და დარწმუნებული ვარ, ასევე გააგრძელებს საქმიანობას.
მინდა მივმართო გადასახადების ყველა გადამხდელს საქართველოში, ქვეყნის ყველა მოქალაქეს, იურიდიულ პირს, ადგილობრივს თუ უცხოელს, რომლებიც აქ ეწევიან ბიზნესს და იხდიან გადასახადებს, ბოლო ორი დღის მოვლენების ფონზე თქვენ თვალნათლივ ხედავთ თუ რაოდენ მნიშვნელოვანია იმ გადასახადებებიდან შემოსული ყოველი ლარი, რომელსაც თქვენ იხდით. თქვენ იცით, რომ საქართველოს ხელისუფლება დაბალი და მარტივი გადასახადების მომხრეა, რომ ჩვენთან ერთ-ერთი ყველაზე დაბალი და ეფექტიანი საგადასახადო სისტემაა მთელს ჩვენს სამეზობლოში, მთელს აღმოსავლეთ ევროპაში. ის გადასახადები, რომლებიც იკრიბება, ხმარდება არამარტო სიღარიბის დაძლევას, ქვეყნის განვითარებას, ინფრასტრუქტურის შექმნას და გაძლიერებას, არამედ როგორც ხედავთ, ასევე ხმარდება ეფექტიანი, პროფესიული, მაღალკვალიფიციური და ძალიან კარგად აღჭურვლი შეიარაღებული ძალების შექმნას. ეს ყოველი თქვენგანის დამსახურებაა. დარწმუნებული ვარ, ამ დღეებში, მიუხედავად ამ პერიოდის სირთულისა, გადასახადების აკრეფა გაგრძელდება ისევე ეფექტიანად, როგორც აქამდე ხდებოდა.
შემდეგ საქართველოს პრემიერ-მინისტრმა სთხოვა საქართველოს ფინანსთა მინისტრს ნიკა გილაურს ინფორმაციის წარმოდგენა საბაჟო უწყების მუშაობის შესახებ.
საქართველოს ფინანსთა მინისტრმა თქვა, რომ საბაჟო უწყება მუშაობს ისევე, როგორც ის ფუნქციონირებდა ბოლო პერიოდის განმავლობაში. საბაჟო უბნებზე არანაირი შეფერხებები არ არის, სიმშვიდეა და ამ და საგადასახადო მიმართულებით პრობლემები არ გვაქვს.
საქართველოს პრემიერ-მინისტრმა მადლობა გადაუხადა საქართველოს ფინანსთა მინისტრს მოწოდებული ინფორმაციისათვის და თქვა: მინდა ასევე შევეხო საქართველოში საბანკო სისტემის მუშაობას, რომელიც გუშინ და დღესაც აბსოლუტურად გამართული იყო. ამაში ეჭვი არ მეპარებოდა, მაგრამ ახლა თვალნათლივ გამოჩნდა, სისტემის მდგრადობა იმდენად მაღალია, რომ შეუძლია საომარ ვითარებასაც კი გაუძლოს ყოველგვარი პრობლემებისა და გართულების გარეშე. სხვათა შორის, ეროვნული ბანკი წავიდა მნიშვნელოვან, დროულ, ეფექტიან ნაბიჯზე და დღესაც გახსნა და ჩაატარა თბილისის სავალუტო ბირჟის ვაჭრობა. ჩემდა გასაკვირად, შეიძლება ნაწილობრივ მძიმე ფონის გამო, დღეს სავალუტო ბირჟის ვაჭრობაზე დაფიქსირდა ლარის კურსის მცირეოდენი, მაგრამ მაინც გამყარება 30 მეათასედით. მინდა აღვნიშნო, რომ ეროვნული ბანკის სავალუტო რეზერვები პრაქტიკულად შეადგენს 1,5 მილიარდ დოლარს, რაც უცვლელია ამ ბოლო ორი დღის განმავლობაში წინა თვის ბოლოსთან შედარებით. გარდა ამისა, თქვენ იცით, რომ ამ გაზაფხულზე ჩვენთან ჩამოყალიბდა სტაბილური განვითარების ფონდი და მომავალი თაობების ფონდი, სადაც დამატებით კიდევ 370 მილიონი დოლარია. ქვეყანაში არის სიმტკიცე, მდგრადობა, შექმნილია როგორც სტრატეგიული საკვები პროდუქტების, ისე საწვავის მარაგი, არის ფული, მდგრადი სატრანსპორტო ინფრასტრუქტურა, შესაბამისი უწყებების მზაობა, რომ დაზიანების შემთხვევაში ეს ინფრასტრუქტურა მაქსიმალურად მოკლე ვადებში აღდგეს, ყველა სამთავრობო უწყება ეფექტიანად მუშაობს, ჩამოყალიბებულია გადასახადების აკრეფის მაღალი დონე და კულტურა, ჩვენი ეკონომიკა ყველანაირად მზად არის ამ გამოცდისათვის.
გისურვებთ ყველას ასევე წარმატებით გააგრძელოთ მუშაობა.გმადლობთ.
საქართველოს მთავრობის კანცელარიის საორგანიზაციო დეპარტამენტი