2008 წლის 30 ივლისს გაიმართა საქართველოს მთავრობის სხდომა. დღის წესრიგში შეტანილი იყო 45 საკითხი. დღის წესრიგი
სხდომის დაწყებისას საქართველოს პრემიერ-მინისტრმა ვლადიმერ გურგენიძემ დამსწრეთ აცნობა, რომ დღეს მთავრობა შეუდგება 50-თვიანი სამთავრობო პროგრამის განხილვას, რაც დაახლოებით ერთ კვირას გაგრძელდება. ამ პერიოდში მთავრობის წევრები წარმოადგენენ საკუთარ კომენტარებსა და მოსაზრებებს, რომლებიც შეჯერდება და აგვისტოს მეორე ნახევრისათვის პროგრამის საბოლოო ვარიანტი საქართველოს პრეზიდენტს წარედგინება.
საქართველოს პრემიერ-მინისტრმა დამსწრეთ მიაწოდა ინფორმაცია, რომ ივლისში ფინანსთა სამინისტროს ხელმძღვანელებთან ერთად იმყოფებოდა ლონდონში, ბოსტონსა და ნიუ-იორკში, სადაც გაიმართა შეხვედრები მსხვილ ინვესტორებთან. მან თქვა, რომ შეხვდნენ დაახლოებით 27 მსხვილი საინვესტიციო ფონდის წარმომადგენლებს. აღსანიშნავია, რომ ისინი გულდასმით ადევნებენ თვალყურს ყოველივეს, რაც აქ ყოველდღიურად ხდება. ამავდროულად, ისინი ძალზე დადებითად აფასებენ მიმდინარე წლის პირველ კვარტალში ჩვენი ეკონომიკური საქმიანობის შედეგებს, იმ ზრდას (9,3 %), რომელიც გვქონდა. ძალიან დადებითად აფასებენ იმ ფაქტს, რომ, ჩვენი მეზობლებისაგან განსხვავებით, შევძელით ინფლაციაში გარდატეხის შეტანა და ამჟამად, ჩვენთან არსებული ინფლაციის მაჩვენებელი ყველაზე დაბალია რეგიონში. ასევე, ძალზე დადებითად არის შეფასებული ის, რომ მიუხედავად ძალიან დატვირთული პოლიტიკური სეზონისა, რომელიც საქართველოში აღინიშნა მიმდინარე წლის პირველ ნახევარში, ლიბერალურ რეფორმების განხორციელება ქვეყანაში კვლავაც გრძელდება.
საქართველოს მთავრობის კანცელარიის საორგანიზაციო დეპარტამენტი