2008 წლის 17 იანვარს გაიმართა საქართველოს მთავრობის სხდომა. დღის წესრიგში შეტანილი იყო 47 საკითხი. დღის წესრიგი
მთავრობის სხდომის დაწყებისას საქართველოს პრემიერ-მინისტრმა ვლადიმერ გურგენიძემ დამსწრეთ მიაწოდა ინფორმაცია 14-16 იანვარს ავსტრიაში თავისი ვიზიტის შესახებ. მან თქვა, რომ გაიმართა შეხვედრები ეუთოს წარმომადგენლებთან, სხვადასხვა ქვეყნის ელჩებთან. მათ მიეწოდათ ინფორმაცია საქართველოში პარლამენტის არჩევნებისათვის მზადების, კონფლიქტების გადაწყვეტისა და სხვა აქტუალურ საკითხებზე. საქართველოს დელეგაციამ აქტიური მონაწილეობა მიიღო ჟურნალ ,,ევრომანის" კონგრესის მუშაობაში, რომელიც ყოველწლიურად იმართება და წარმოადგენს ძალზე პრესტიჟულ ღონისძიებას აღმოსავლეთ ევროპის ქვეყნებით დაინტერესებული ინვესტორებისა და ბანკირებისათვის.
კონგრესი, რომელსაც 1200 დელეგატი ესწრებოდა, გაიხსნა საქართველოს პრემიერ-მინისტრის მოხსენებით. დელეგატებს მიეწოდათ ინფორმაცია საქართველოში გამართული პრეზიდენტის არჩევნების, აგრეთვე იმ პროცესების თაობაზე, რომლებიც ქვეყანაში განვითარდა ბოლო ორი-სამი თვის განმავლობაში. მაგრამ მთავარი, რასაც განსაკუთრებული ყურადღება მიექცა, იყო პერსპექტივები. ყველა ინვესტორი თუ დასავლეთის ბანკების წარმომადგენლები, ვისაც შევხვდით, კმაყოფილი დარჩნენ იმ საკანონმდებლო პაკეტით, რომელიც გასულ კვირას საქართველოს პარლამენტში შევიტანეთ. მათ მიაჩნიათ, რომ ეს არის მართლაც უპრეცედენტო პაკეტი, რომელშიც სრული მოცულობით არის გათვალისწინებული ინვესტორთა სადღეისო ინტერესი და გარანტია, რომ რადიკალური ეკონომიკური რეფორმების კურსი გაგრძელდება გამართული არჩევნების შედეგებიდან გამომდინარე. ამ სიტუაციაზე ასევე დადებითად იმოქმედა დიალოგისაკენ გადადგმულმა ნაბიჯებმაც. გაიმართა შეხვედრა ფოთის ნავსადგურით დაინტერესებულ ინვესტორებთან. ინტერესი ძალზე დიდია, თუმცა არის მრავალი კითხვის ნიშანი, რომელიც მოიხსნება მას შემდეგ, რაც ქვეყნის პარლამენტი დაამტკიცებს ზემოხსენებულ საკანონმდებლო პაკეტს.
ბოლო დღეებში განხორციელდა მნიშვნელოვანი ინვესტიციები: დასავლეთის რამდენიმე მსხვილმა საინვესტიციო ფონდმა განაცხადა, რომ შემოიტანა 90 მილიონი დოლარი; მიუხედავად გლობალურ საკრედიტო ბაზრებზე დღეს არსებული ვითარებისა, საქართველოს ბანკმა მოიზიდა 65 მილიონი დოლარი; განახლდა საპრივატიზაციო პროცესი, კერძოდ გაიყიდა ერთ-ერთი საწარმო, რის შედეგად მივიღეთ რამდენიმე მილიონი დოლარი. ანუ საინვესტიციო პროცესი, რომელმაც განაპირობა სწრაფი ეკონომიკური ზრდა ბოლო ორი-სამი წლის განმავლობაში, პრაქტიკულად აღგენილია. ეს ძალზე მნიშვნელოვანია, რადგან ინვესტიციები ნიშნავს სამუშაო ადგილებს, ჩვენი ეკონომიკის წინსვლასა და სიღარიბის დაძლევას, აღნიშნა დასასრულ საქართველოს პრემიერ-მინისტრმა.
საქართველოს მთავრობის კანცელარიის საორგანიზაციო დეპარტამენტი