2007 წლის 10 ოქტომბერს გაიმართა საქართველოს მთავრობის სხდომა. დღის წესრიგში შეტანილი იყო 51 საკითხი. დღის წესრიგი
სხდომის დაწყებისას საქართველოს პრემიერ-მინისტრმა ზურაბ ნოღაიდელმა მიულოცა მთავრობის წევრებს ეკა ტყეშელაშვილს და გიორგი არველაძეს შვილების შეძენა.საქართველოს პრემიერ-მინისტრმა სთხოვა საქართველოს სოფლის მეურნეობის მინისტრს პეტრე ცისკარიშვილს მთავრობის წევრების ინფორმირება რთვლის მიმდინარეობის შესახებ.
საქართველოს სოფლის მეურნეობის მინისტრმა მთავრობის წევრებს მოახსენა, რომ დღეისათვის კახეთის რეგიონში მოკრეფილია ყურძნის მოსავლის დაახლოებით ორი მესამედი და ღვინის ქარხნებში გადამუშავებულია 37800 ტონა ყურძენი. ამ რაოდენობიდან საფერავის ჯიშის ყურძნის წილად მოდის 26 ათას ტონამდე, რქაწითლისა - 9 ათას ტონამდე, დანარჩენი - ჰიბრიდული ჯიშის ყურძენზე. მოსავალი ასაღებია დედოფლისწყა-როსა და საგარეჯოს რაიონებში, აგრეთვე გურჯაანის რაიონის კაჭრეთის ზონაში, რომელიც ზღვის დონიდან შედარებით მაღლა მდებარეობს და ყურძენიც გვიან აღწევს საკრეფ კონდიციას.
მინისტრმა ხაზგასმით აღნიშნა, რომ რთვლის განმავლობაში მთელი საქართველოს მოსახლეობის მხრიდან იგრძნობა გამუდმებული მოთხოვნა ყურძენზე, რაც, ერთი მხრივ, განპირობებულია ახალი საკანონმდებლო ბაზის ამოქმედებით, და, მეორე მხრივ, რუსეთის მიერ გამოცხადებული ემბარგოს წინააღმდეგ ქართველი ხალხის მობილიზებით. წელს კახეთიდან საქართველოს დანარჩენ რეგიონებს მიეწოდათ რეკორდული რაოდენობის ყურძენი, დაახლოებით 50 ათასი ტონა. უახლოეს დღეებში ყურძნის გადამუშავებას შეუდგებიან რაჭის ღვინის საწარმოები.
შემდეგ მინისტრმა თქვა, რომ წელს საქართველოში ყურძნის უხვი მოსავალია, რომელიც იმავდროულად მაღალხარისხიანია. მაგალითად, წელს მარტო საფერავის ჯიშის ყურძენი გადამუშავებულია 26 ათასი ტონა, იმაზე მეტი, ვიდრე ღვინის ქარხნებმა გადაამუშავეს შარშან ყველა ჯიშის ყურძენი ერთად აღებული, ანუ 25 ათასი ტონა. საქართველოს ღვინის კომპანიებს შესაძლებლობა აქვთ იყვნენ კონკურენტუნარიანი, აწარმოონ საკუთარი პროდუქცია შედარებით დაბალ ფასებში, ამავე დროს გააუმჯობესონ მისი ხარისხი, აითვისონ ახალი ბაზრები, დაიმკვიდრონ ადგილი ღვინის მსოფლიო რუკაზე და არ იყვნენ ორიენტირებული მხოლოდ რუსეთსა და დსთ-ს ქვეყნებზე, როგორც ეს წლების განმავლობაში ხდებოდა. სწორედ ამ მიზანს ემსახურება საქართველოს პრეზიდენტის ინიციატივა ახალ ბაზრებზე ქართული ღვინის პოპულარიზაციის მიზნით განსახორციელებელი ღონისძიებების დაფინანსების შესახებ. დაიწყო მუშაობა სპეციალურ პროგრამაზე, აუცილებელია კონსულტაციების გამართვა ეკონომიკური განვითარების სამინისტროსა და ღვინის საწარმოების ხელმძღვანელებთან, რათა ერთობლივად გადაწყდეს ამ ღონისძიებათა დაფინანსების საკითხი. წარმატებით მიმდინარეობს ბრძოლა ფალსიფიკაციის წინააღმდეგ, დაისაჯნენ ის მეწარმეები, რომელთაც აღმოაჩნდათ ფალსიფიცირებული ღვინო. განხორციელებულმა ღონისძიებებმა შედეგი გამოიღო, თქვა დასასრულს მინისტრმა და პირობა დადო, რომ 2007 წელი იქნება პირველი წელი, როდესაც საქართველოში ფალსიფიცირებული ღვინო არ იარსებებს.
საქართველოს პრემიერ-მინისტრმა მადლობა გადაუხადა სოფლის მეურნეობის მინისტრს მოწოდებული ინფორმაციისათვის და სთხოვა შრომის, ჯანმრთელობისა და სოციალური დაცვის მინისტრს დავით ტყეშელაშვილს მთავრობის წევრების ინფორმირება სახელმწიფო სუბსიდირების პროგრამის შესახებ.
საქართველოს შრომის, ჯანმრთელობისა და სოციალური დაცვის მინისტრმა მთავრობის წევრებს მიაწოდა ინფორმაცია, რომ დაიწყო მუშაობა სახელმწიფო სუბსიდირების პროგრამაზე, რაშიც შრომის, ჯანმრთელობისა და სოციალური დაცვის სამინისტროსთან ერთად ჩაბმული არიან ფინანსთა სამინისტრო, ენერგეტიკის სამინისტრო, სოფლის მეურნეობის სამინისტრო, განათლებისა და მეცნიერების სამინისტრო. მან თქვა, რომ პირველ ეტაპზე მიმდინარეობს მონაცემთა ბაზის დამუშავება, რათა იგი სწორად იქნეს შედგენილი და კუთვნილი დახმარება ყველა ადამიანმა მიიღოს. პრაქტიკულად დასრულებულია ყველა მოსამზადებელი სამუშაო. ამჟამად შესათანხმებელია ტექნიკური საკითხები, რაზეც გრძელდება მუშაობა, და საქართველოს პრეზიდენტის დავალების შესაბამისად სუბსიდიების გაცემა მომავალი ორშაბათიდან დაიწყება. საუბარია 100-ლარიან სუბსიდიაზე, რომელიც ინდივიდუალურად გაიცემა 1200 ათას კაცზე, რომელთაგან 835 ათასი პენსიონერია, 400 ათასამდე - ჩვენი მოსახლეობის სოციალურად დაუცველი ნაწილი, 74 ათასი - პედაგოგი. ჯერ სუბსიდიები გაიცემა თბილისში, შემდეგ - ეტაპობრივად, რეგიონებში. სოფლის მეურნეობის სამინისტროსთან ერთად მიმდინარეობს მუშაობა რეგიონების მოსახლეობისათვის 50-50 კგ ფქვილის დარიგების თაობაზე. დაწყებულია ვაუჩერების ბეჭდვა. ამ მიმართულებით, თქვა მინისტრმა, განსაკუთრებული მნიშვნელობა ექნება საინფორმაციო კამპანიას, რათა მოსახლეობამ მიიღოს ზუსტი ინფორმაცია, თუ რა ფორმით, როგორ და სად უნდა მოხდეს მათი განაღდება. დღეს სუბსიდიების სააგენტოში საბოლოოდ ჩამოყალიბდება შტაბი, რომლის მუშაობაში მონაწილეობას მიიღებენ ადგილობრივი თვითმმართველობის წარმომადგენლებიც. საჭიროა კოორდინირებული მუშაობა, რათა ვაუჩერების დარიგების პროცესი აქტიურად წარიმართოს.
საქართველოს პრემიერ-მინისტრმა მადლობა გადაუხადა შრომის, ჯანმრთელობისა და სოციალური დაცვის მინისტრს მოწოდებული ინფორმაციისათვის და ხაზგასმით აღნიშნა, რომ დღეს, საქართველოს პრეზიდენტის დავალებიდან გამომდინარე, მთავრობის ამოცანაა ზამთრის პერიოდში საქართველოს მოსახლეობის საჭირო პირობებით უზრუნველყოფა. საამისოდ მიმდინარე კვირის ბოლომდე დასრულდება მოსამზადებელი სამუშაოები, რის შესახებ დღევანდელ სხდომაზე იქნება მიღებული სათანადო გადაწყვეტილება, ხოლო მომდევნო კვირიდან დაიწყება სუბსიდიების გაცემა, მოგვიანებით კი - რეგიონებში ფქვილის დარიგება.
საქართველოს მთავრობის კანცელარიის პრესცენტრი