2007 წლის 22 აგვისტოს გაიმართა საქართველოს მთავრობის სხდომა. დღის წესრიგში შეტანილი იყო 34 საკითხი. დღის წესრიგი.
სხდომის დაწყებისას საქართველოს პრემიერ-მინისტრმა ზურაბ ნოღაიდელმა მთავრობას მიაწოდა ინფორმაცია, რომ გასულ კვირას იმყოფებოდა იმერეთში, გურიასა და სამეგრელოში. მან ყურადღება გაამახვილა სკოლების სარემონტო და გზების აღდგენა-რეაბილიტაციის სამუშაოთა მიმდინარეობაზე, აღნიშნა რომ ამჟამად სარემონტო სამუშაოები ხორციელდება 400 სკოლაში და მოუწოდა საქართველოს განათლებისა და მეცნიერების სამინისტროს, სახელმწიფო რწმუნებულებს - გუბერნატორებს და გამგებლებს იმუშაონ უფრო მობილიზებულად, რათა სკოლები სრული მზადყოფნით შეხვდნენ ახალი სასწავლო წლის დაწყებას.
საქართველოს პრემიერ-მინისტრმა ხაზგასმით აღნიშნა, რომ ძალზე მნიშვნელოვანია ის სამუშაოები, რომლებიც ამ რეგიონებში, და მთლიანად საქართველოში ხორციელდება კერძო საინვესტიციო თანხების მოზიდვით ახალი სამუშაო ადგილების შესაქმნელად. მან მოუწოდა მთავრობის წევრებს მხარი დაუჭირონ და აქტიური მონაწილეობა მიიღონ ამ საკითხების განხილვა-გადაწყვეტაში.
საქართველოს მთავრობის კანცელარიის პრესცენტრი