2007 წლის 4 ივლისს გაიმართა საქართველოს მთავრობის სხდომა. დღის წესრიგში შეტანილი იყო 31 საკითხი. დღის წესრიგი
სხდომის დაწყებისას საქართველოს პრემიერ-მინისტრმა ზურაბ ნოღაიდელმა საქართველოს მთავრობის წევრებს გააცნო მიმდინარე წლის პირველ ნახევარში საფინანსო-ეკონომიკური საქმიანობის შედეგების რამდენიმე მონაცემი. მან აღნიშნა, რომ გასული წლის ანალოგიურ პერიოდთან შედარებით მიმდინარე წლის ექვს თვეში შეიქმნა 30%-ით მეტი ახალი კერძო საწარმო, ხოლო მათი ხელფასის ფონდი 49,2%-ით გაიზრდა. ჩვენი გეგმები ახალი სამუშაო ადგილების შექმნასთან დაკავშირებით, თქვა საქართველოს პრემიერ-მინისტრმა, წარმატებით სრულდება და იმედი გამოხატა, რომ ეს ტენდენცია წლის მეორე ნახევარშიც შენარჩუნებული იქნება. კერძოდ, წელს საქართველოს ეკონომიკაში ველოდებით დაახლოებით 90 ათასი ახალი სამუშაო ადგილის შექმნას. ეს იმას ნიშნავს, რომ მიმდინარე წლის განმავლობაში დასაქმდება 90 ათასი ჩვენი თანამოქალაქე, რაც ეკონომიკური ზრდის ძალზე მნიშვნელოვანი შედეგია. მან ასევე აღნიშნა, რომ ივნისში სამომხმარებლო ფასების ინდექსი - ინფლაცია მინუს 0,2% იყო, 6 და 12 თვის ინფლაცია, შესაბამისად, - 4,1 და 7,3%. ეს მაჩვენებლები, აგრეთვე საქართველოს ეკონომიკის განვითარების ტემპები, იმ ფარგლებშია, რომლებიც ეკონომიკური რეფორმების შედეგად იყო დაგეგმილი.
საქართველოს პრემიერ-მინისტრმა დამსწრეთ შეახსენა, რომ მიმდინარე კვირაში დაიწყო უმაღლეს სასწავლებლებში მისაღები ერთიანი ეროვნული გამოცდები და სთხოვა საქართველოს განათლებისა და მეცნიერების მინისტრს ალექსანდრე ლომაიას მთავრობის წევრების ინფორმირება გამოცდების მიმდინარეობის შესახებ.
საქართველოს განათლებისა და მეცნიერების მინისტრმა ალექსანდრე ლომაიამ დამსწრეთ აცნობა, რომ მესამე დღეა, რაც მიმდინარეობს უმაღლეს სასწავლებლებში მისაღები ერთიანი ეროვნული გამოცდები. წელს მათში მონაწილეობს აბიტურიენტების სარეკორდო რაოდენობა, დაახლოებით 40 ათასი ახალგაზრდა, რაც შვიდი ათასით მეტია ვიდრე შარშან. გამოცდები მიმდინარეობს სტაბილურად, მშვიდ და საქმიან ვითარებაში, ტექნიკურ-ორგანიზაციული ხარვეზების გარეშე. ყველა საგამოცდო ტესტი დასრულდება 18 ივლისს, შემდეგ დაიწყება შედეგების დამუშავება, რომელთა საბოლოო მონაცემები გამოცხადდება აგვისტოს შუა რიცხვებში.
საქართველოს პრემიერ-მინისტრმა აღნიშნა, რომ ერთიანი ეროვნული გამოცდები საზოგადოებისათვის უკვე ჩვეულებრივი მოვლენა გახდა და ჩვენ ძალზე დიდ მნიშვნელობას ვანიჭებთ მათ შედეგებს, საერთოდ, განათლების პროცესს მის ყველა საფეხურზე. მან კმაყოფილება გამოხატა ერთიანი ეროვნული გამოცდების მიმდინარეობით და მადლობა გადაუხადა საქართველოს განათლებისა და მეცნიერების მინისტრს ალექსანდრე ლომაიას, სამინისტროს მთელ კოლექტივს ამ მიმართულებით გაწეული საქმიანობისათვის.
საქართველოს მთავრობის კანცელარიის პრესცენტრი