საქართველოს მთავრობის განკარგულება №813
21 დეკემბერი, 2007
,,ყაზბეგის რაიონში მუდმივად მცხოვრები მოსახლეობის მიერ მოხმარებული ბუნებრივი გაზის ღირებულების ანაზღაურების თაობაზე" საქართველოს მთავრობის 2007 წლის 14 სექტემბრის N499 განკარგულებაში ცვლილებებისა და დამატების შეტანის შესახებ
1. ,,ყაზბეგის რაიონში მუდმივად მცხოვრები მოსახლეობის მიერ მოხმარებული ბუნებრივი გაზის ღირებულების ანაზღაურების თაობაზე" საქართველოს მთავრობის 2007 წლის 14 სექტემბრის N499 განკარგულებაში შეტანილ იქნეს შემდეგი ცვლილებები:
ა) პირველი პუნქტი ჩამოყალიბდეს ახალი რედაქციით:
,,1. საქართველოს შრომის, ჯანმრთელობისა და სოციალური დაცვის სამინისტროს საჯარო სამართლის იურიდიულმა პირმა - სოციალური სუბსიდიების სააგენტომ (შემდგომში - სსიპ - სოციალური სუბსიდიების სააგენტო) 2007 წლის 15 ოქტომბრიდან 31 დეკემბრამდე, ხოლო საქართველოს ენერგეტიკის სამინისტრომ 2008 წლის 1 იანვრიდან 15 მაისამდე და 2008 წლის 15 ოქტომბრიდან 31 დეკემბრამდე პერიოდებში უზრუნველყონ ყაზბეგის მუნიციპალიტეტში (რაიონში) მცხოვრები მოსახლეობის (აბონენტების) მიერ ყოველ კალენდარულ თვეში თითოეული აბონენტის მიერ მოხმარებული ბუნებრივი აირის ოდენობიდან არა უმეტეს 700 კუბ.მ ღირებულების ანაზღაურება, ამასთან, ოქტომბერსა და მაისში ანაზღაურდება თითოეული აბონენტის მიერ მოხმარებული ბუნებრივი აირის ოდენობიდან არა უმეტეს 350 კუბ.მ ბუნებრივი აირის საფასური.";
ბ) მე-2 პუნქტს დაემატოს შემდეგი რედაქციის ,,გ" ქვეპუნქტი:
,,გ) საქართველოს ენერგეტიკის სამინისტრომ (ა. ხეთაგური) 2008 წლის სახელმწიფო ბიუჯეტის ასიგნებათა ფარგლებში გაითვალისწინოს ყაზბეგის მუნიციპალიტეტში (რაიონში) მცხოვრები მოსახლეობისათვის ბუნებრივი აირის საფასურის ასანაზღაურებელი თანხა.";
გ) მე-3 პუნქტი ჩამოყალიბდეს შემდეგი რედაქციით:
,,3. სსიპ - სოციალური სუბსიდიების სააგენტომ:
ა) ყაზბეგის მუნიციპალიტეტში (რაიონში) მცხოვრები ,,სოციალურად დაუცველი ოჯახების მონაცემთა ერთიან ბაზაში" რეგისტრირებულ ოჯახებს, რომელთა სოციალურ-ეკონომიკური მდგომარეობის მაჩვენებელი შეადგენს ან ნაკლებია 100.000 ქულაზე, 2007 წლის 15 ოქტომბრიდან 1 დეკემბრამდე დახმარების სახით ოქტომბრის თვეში აუნაზღაუროს 350 კუბ.მ ბუნებრივი აირის საფასური, ხოლო ნოემბრის თვეში - 700 კუბ.მ ბუნებრივი აირის საფასური;
ბ) 2007 წლის პირველი დეკემბრიდან 2007 წლის 31 დეკემბრამდე პერიოდში მოხმარებულ ბუნებრივ აირზე განკარგულებით გათვალისწინებული შეღავათების ანაზღაურება უზრუნველყოს პირველი პუნქტით გათვალისწინებული მოსახლეობისათვის, შპს ,,ქართლიგაზისათვის" სათანადო თანხის გადარიცხვით, მის მიერ წარმოდგენილი ანგარიშის საფუძველზე.";
დ) განკარგულებას დაემატოს შემდეგი შინაარსის ,,31" პუნქტი:
,,31. საქართველოს ენერგეტიკის სამინისტრომ:
ა) განკარგულების პირველი პუნქტის შესრულების მიზნით უზრუნველყოს შპს ,,ქართლიგაზთან" სათანადო ხელშეკრულებების გაფორმება და თანხების დანიშნულებისამებრ გადარიცხვა ამ უკანასკნელის მიერ წარმოდგენილი ანგარიშების საფუძველზე;
ბ) 2008 წლის მაისის თვეში უზრუნველყოს წინამდებარე განკარგულებით მისთვის გაცემული დავალებების შესრულების მიმდინარეობის შესახებ ინფორმაციის მთავრობისათვის წარმოდგენა.".
2. განკარგულება ძალაშია ხელმოწერის დღიდან.
პრემიერ-მინისტრი ვლადიმერ გურგენიძე