საქართველოს მთავრობა government.gov.ge |
2013 წლის 19 დეკემბრის მთავრობის სხდომა
2013 წლის 19 დეკემბერს მთავრობის სხდომა გაიმართა. სხდომაზე დღის წესრიგით დღეს 26 საკითხი განიხილეს, დაემატა 2, დამტკიცდა 28 საკითხი. მთავრობის სხდომის გადაწყვეტილებით, კანონში ცვლილების შეტანის გზით, „ნარკოტიკული საშუალებების, ფსიქოტროპული ნივთიერებების, პრეკურსორებისა და ზოგიერთი ფსიქოაქტიური ნივთიერებების შემცველი სამკურნალო საშუალებების ნუსხისა და მათი ლეგალური ბრუნვის წესების დამტკიცების შესახებ" საქართველოს შრომის, ჯანმრთელობისა და სოციალური დაცვის მინისტრის N22/ნ ბრძანებით განსაზღვრულ ფარმაცევტულ პროდუქტზე გავრცელდება კონტროლის ის რეჟიმები, როგორიც დადგენილია I ჯგუფისთვის მიკუთვნებულ სხვა სამკურნალო საშუალებებზე. აღნიშნული ცვლილება შესაძლებელს გახდის მათ მიმოქცევაზე (იმპორტი, შენახვა, აღრიცხვა, გაცემა) მკაცრი კონტროლის განხორციელებას და საბოლოოდ, იმ უარყოფითი შედეგების თავიდან აცილების შესაძლებლობას, რაც შესაძლოა მოჰყვეს მითითებული ფარმაცევტული პროდუქტების არამიზნობრივ გამოყენებას. პროექტის თანახმად, საქართველოს შრომის, ჯანმრთელობისა და სოციალური დაცვის მინისტრის ბრძანებით განისაზღვრება იმ ავადმოხმარებადი სამკურნალო საშუალებების, მათ შორის, პრეპარატების ნუსხა (ისეთი სამკურნალო საშუალებები და პრეპარატები, რომელთა არადანიშნულებისამებრ გამოყენება სუფთა სახით ან სხვა ნივთიერებებთან ერთად იწვევს ნარკოტიკულ თრობას), რომლებზეც გავრცელდება სპეციალურ კონტროლს დაქვემდებარებული ნივთიერებებისათვის დადგენილი კონტროლის რეჟიმი და ლეგალური ბრუნვის წესები. პრემიერ-მინისტრის პრესსამსახური |