2022-05-13
საქართველოს პრემიერ-მინისტრი ირაკლი ღარიბაშვილი „განახლებული რეგიონების" პროგრამის ფარგლებში ოზურგეთში მიმდინარე სამუშაოებს გაეცნო.
მთავრობის მეთაურს განხორციელებული სამუშაოების შესახებ ინფორმაცია რეგიონული განვითარებისა და ინფრასტრუქტურის მინისტრმა ირაკლი ქარსელაძემ მიაწოდა. მისი თქმით, ქალაქ ოზურგეთში 1.9 მილიონი ლარის სარეაბილიტაციო სამუშაოები მიმდინარეობს.
დაგეგმილია ცენტრალური მოედნისა და მიმდებარე ტერიტორიის, მათ შორის 2 შენობის განახლება.
გარდა ამისა, ოზურგეთის მუნიციპალიტეტის დაფინანსებით კულტურისა და დასვენების პარკის რეაბილიტაცია მიმდინარეობს. პროექტის ღირებულება 2.6 მილიონ ლარს შეადგენს. დაგეგმილია პარკის სრული რეაბილიტაცია, ატრაქციონების, განათებების, წყალარინების მოწყობა, ასევე ამფითეატრისა და კაფეს მშენებლობა.
პრემიერ-მინისტრთან ერთად ადგილზე აღმასრულებელი, საკანონმდებლო და ადგილობრივი ხელისუფლების წარმომადგენლები იმყოფებოდნენ.
მთავრობის ადმინისტრაციის პრესსამსახური