27 სექტემბერს საქართველოს პრემიერ-მინისტრი ზურაბ ნოღაიდელი ერთდღიანი სამუშაო ვიზიტით აზერბაიჯანის რესპუბლიკაში იმყოფებოდა.
ზურაბ ნოღაიდელმა მონაწილეობა მიიღო საქართველო-აზერბაიჯანის ეკონომიკური თანამშრომლობის ერთობლივი სამთავრობათაშორისო კომისიის სხდომაში. განიხილეს ქვეყნებს შორის ეკონომიკური თანამშრომლობის საკითხები, მათ შორის საქართველოს აზერბაიჯანული გაზით მომარაგების საკითხი, ასევე ყარსი-ახალქალაქის პროექტის მიმდინარეობა. სხდომის შემდეგ ხელი მოეწერა საქართველო-აზერბაიჯანის ეკონომიკური თანამშრომლობის ერთობლივი სამთავრობათაშორისო კომისიის ოქმს.
აღინიშნა, რომ აზერბაიჯანი მომავალი წლიდან საქართველოსთვის ბუნებრივი აირის მთავარი და შესაძლოა ერთადერთი მომწოდებელი გახდეს, რის შედეგადაც საქართველო აღარ იქნება ენერგეტიკულად დამოკიდებული რუსეთზე: ,,აზერბაიჯანი მომავალი წლიდან გახდება საქართველოს გაზის მთავარი მომწოდებელი. კმაყოფილი ვარ დღევანდელი მოლაპარაკების შედეგით. გადავდგით კიდევ ერთი მნიშვნელოვანი ნაბიჯი საქართველოს ენერგოდამოუკიდებლობისა და საქართველოს ენერგეტიკული რესურსების მოწოდების დივერსიფიკაციისკენ", - განაცხადა ზურაბ ნოღაიდელმა.
ვიზიტის ფარგლებში საქართველოს პრემიერ-მინისტრმა შეხვედრები გამართა აზერბაიჯანის რესპუბლიკის პრეზიდენტთან ილჰამ ალიევთან და აზერბაიჯანის რესპუბლიკის პრემიერ-მინისტრთან არტურ რასი-ზადესთან.
საქართველოს მთავრობის კანცელარიის პრესცენტრი