Берлин, аҧылара аофициалтә церемониа ашьҭахь, Қырҭтәыла аҧыза-министр Иракли Ҕарибашвилии Германтәылатәи афедеративтә республика аканцлер Олаф Шольци, зны ишиашоу, анеҩс, ирҭбаау аформатаҿ еиҧылеит.
Иракли Ҕарибашвилии Олаф Шольци реиҧылараҿы ирылацәажәеит Қырҭтәылеи Германтәылеи рпартниорреи, ашәарҭадара аганахьала арегион аҿы аҭагылазаашьеи, Қырҭтәыла ианашьоу европатәи аперспективеи, ҩ-тәылак рыбжьара ахәаахәҭра-економикатә еизыҟазаашьақәеи.
Аиҧылараҿы аганқәа рхаҭарнакцәа иаҵшьны иазгәарҭеит Қырҭтәылеи Германтәылеи рпартниортә еизыҟазаашьақәа рыҕәҕәара, дара ишырҳәаз ала, астратегиатә усеицура иаҳа арҭбаара иазыхиоуп.
Аиҧылараҿы арегионалтәи аглобалтәи апроблемақәагьы ирзааҭгылеит. Аганқәа рхаҭарнакцәа Украина иаҿагылоу Урыстәыла арратә агрессиа илацәажәан, даҽазнык иаҵшьны иазгәарҭеит аҭагылазаашьа адеескалациеи аҭынчра аиқәыршәареи азы жәларбжьаратәи аиҩызара аҽазышәарақәа ирымоу аҵакы ду.
Қырҭтәыла аҧыза-министр Урыстәыла ала Қырҭтәыла аҵакырадгьылқәа рымпыҵахалареи, 2008 шықәсатәи арратә агрессиеи, Урыстәыла афедерациа азакәандаратә ауранагӡареи дазааҭгылеит, иара ишиҳәаз ала, абри зегьы аҭыҧаҿы ашәарҭадаратә лагылазаара иаҧырхагоуп.
Абри аганахьала ҷыдала иазгәаҭан Германтәыла ала Қырҭтәыла адгылара аҵакы ҷыда, Қырҭтәыла ахьыҧшымреи, аҵакырадгьылтә акзаареи азҵаареи, иара убас, Урыстәыла-Қырҭтәылатәи аимак аҭынчмҩала аҭыҧқәҵара апроцесси аҿы. Иаҵшьны иазгәаҭан Қырҭтәыла аҵакырадгьылаҿ Евроеидгыла амониторинг амиссиаҿы Германтәыла иҟанаҵо алагала ду.
Иара убас, аиҧылараҿы аганқәа рхаҭарнакцәа, Қырҭтәыла европатәи аперспектива анашьара иазкны Европатәи ахеилак иаднакылаз аӡбареи, уи аҵаки иазааҭгылеит. Иракли Ҕарибашвили германтәылатәи иколлега ҭабуп ҳәа иеиҳәеит аҭоурыхтә аӡбареи, иара убас, евроинтеграциа апроцесс аҿы Германтәыла Қырҭтәыла иазаанарҧшуа аполитикатәи апрактикатәи адгылареи азыҳәан. Арегиони адунеи иҟоу апроблемақәа рфонаҿы, хшыҩзышьҭра ҷыда азун жәларбжьаратәи апартниорцәа рыла Қырҭтәылеи Ассоциациатә трио атәылақәеи рыдгылара аҵакы.
Қырҭтәыла аҧыза-министр иаҵшьны иазгәеиҭеит европатәи аперспектива Евроеидгылашҟа аинтеграциа апроцесс аҿы Қырҭтәылазы иамоу аҵакы, ишазгәаҭаз ала, атәыла ари апроцесс ҭакҧхықәра дула иазныҟәоит. Ари аконтекст аҿы хшыҩзышьҭра рызун Европатәи ахеилак абжьагарақәа рынагӡара аҵаки, иҟаҵатәу ашьаҿақәеи, ауснагӡатәқәа рплани. Ишазгәаҭаз ала, ари ахырхарҭала аинклиузивтә усура мҩаҧысуеит, уи иалахәып апарламенти, аиҳабыреи, аоппозициатә партиақәеи, атәылауаҩратә уаажәларреи.
Иара убас, аиҧылараҿы иаҵшьны иазгәаҭан арегионалтә шәарҭадара аиқәыршәара апроцесс аҿы Қырҭтәыла инанагӡо ароль, уи аҵакы ҷыда амоуп арегион иҭышәынтәалоу аҿиаразы. Азербаиџьантәи ареспубликеи Шәамахьтәылеи рыбжьара бџьарлатәи аимак аконтекст аҿы даҽазнык иаҵшьны иазгәаҭан Қырҭтәыла қәҿиарала имҩаҧнаго амедиациеи аҧыза-министр иаҧшьигаз Аахыҵ Кавказ аҭынчратә инициатива аҵакы ҷыдеи.
Аиҧылараҿы даҽазнык аҭабура аарҧшын евроатлантикатә шәарҭадара аиқәыршәара аус аҿы Қырҭтәыла иҟанаҵо алагала ду азыҳәан, иара убас, иаҵшьны иазгәаҭан Алианс аҭынчрачаҧаратә миссиақәа рҿы германтәылатәи аган рҟны қәҿиарала аусеицура.
Қырҭтәылеи Германтәылеи ҩ-ганктәи реизыҟазаашьақәа ианрылацәажәоз, еиуеиҧшым аусхкқәа рҿы аусеицура иазааҭгылеит. Ишазгәаҭаз ала, Германтәыла Қырҭтәыла ахадаратә ахәаахәҭра-економикатә партниорцәа иреиуп. Аганқәа рхаҭарнакцәа ишырҳәаз ала, ахәаахәҭра-економикатә аимадарақәа рпотенциал инагӡаны ахархәара иазыхиоуп. Ари аконтекст аҿы ҷыдала иазгәаҭан Азиеи Европеи еимыздо атранзиттә центр ҳасабала Евроеидгылазы Қырҭтәыла иамоу аҵакы.
Қырҭтәыла аҧыза-министр ишазгәеиҭаз ала, ари ахырхарҭала германтәылатәи атранспорттәи алогистикатәи еилахәырақәа аус рыцура дазыхиоуп.
Аганқәа рхаҭарнакцәа ишазгәарҭаз ала, 2023 шықәсазы Қырҭтәыла, адкыларатә тәыла астатусла, атуристтә цәыргақәҵа дуӡӡа - ITB Berlin иалахәхәоит, уи Германтәыла мацараҿ акәымкәа, Европа зехьынџьара Қырҭтәыла аӡыргареи атәыла атуристтә потенциал аарҧшреи иацхраауеит.
Аганқәа рхаҭарнакцәа атәылақәа руааҧсыра реиҩызаратә еизыҟазаашьақәа ибзианы ирыхцәажәан, ишырҳәаз ала, атәылақәа реиҳабырақәа акультура аусхкы аҿы ирыбжьарҵаз акомплекстә меморандум ақырҭуеи анемеци жәларқәеи, аҟазареи аҵарадырреи ахаҭарнакцәеи реизааигәахара иацхраауеит.
Иракли Ҕарибашвили Олаф Шольц аҭактә визитла Қырҭтәылаҟа дааиҧхьеит.
Аиҧылара ашьҭахь, Қырҭтәыла аҧыза-министр Иракли Ҕарибашвилии Германтәылатәи афедеративтә республика аканцлер Олаф Шольци апрессконференциа мҩаҧыргеит.
Аиҳaбырa рaдминистрaциa aпрессмaҵзура