2020-12-28
Аусуратә ҭыҧ ҿыцқәа раҧҵара мацара акәымкәа, уажәазы иҟоу аусуратә ҭыҧқәа рыхьчарагьы Қырҭтәыла аиҳабыра рзы ахадаратә ҵакы змоу ҳасабтәуп, - иҳәеит Қырҭтәыла Аҧыза-министр Гьаргь Гахариа Русҭави, „Қарҭли Текстиль" анаплакы ҿыц аартра ацеремониаҿы данықәгылоз.
Аиҳабыра рнапхгаҩы иҳәамҭала, анеҩстәи ашықәс анҵәамҭанӡа абри анаплакы аҿы аусура иалагоит 4 000-ҩык раҟара Русҭави инхо ауааҧсыра.
„Анаплакы ҧшьымз рыла идыргылеит. Ҧхынгәы азы, абра ҳаныҟаз, адунеи аҿы глобалтә пандемиа ашыкьымҭа иҟан, усҟан, ҳареи аинвесторцәеи, аекономика аминистрра апрограмма „Иҟаҵа Қырҭтәылаҿ" ахархәара ала, абри апроект ҧшьымз рыла ахыркәшара ҳаӡбеит, ҧшьымз рышьҭахь, ашықәс анҵәамҭанӡа Русҭави ауааҧсыра абра аусура иалагароуп ҳәа ҳҳәеит, иахьа ари аус наҳагӡеит. Ҳәарада, раҧхьа иргыланы, сара, абри анаплакы аҿы аусура иалаго ауааҧсыра ирыдысныҳәалар сҭахуп, иара убас, аинвесторцәеи, „Иҟаҵа Қырҭтәылаҿ" агәыҧи ирыдысныҳәалоит, избанзар дара иуадаҩӡоу аҭагылазаашьаҿы ари апроект ахыркәшара рылшеит. Ҳазынтәгьы ибзианы еилаҳкаароуп иахьа абизнесгьы аинвесторцәагьы рахь даҽа азнеишьак ҳамазароуп, избанзар иахьазы аусуратә ҭыҧ цыҧхьаӡа атәылазы иаҵанакәа рацәоуп. Ҳара аусуратә ҭыҧ ҿыцқәа раҧҵара мацара акәымкәа, уажәраанӡа иҟаз аусуратә ҭыҧқәа рыхьчарагьы ҳазҿлымҳауп, убри ауп иахьазы Қырҭтәыла аиҳабыра ахадаратә ҳасабтәс ирымоу. Убри аҟынтә, сара аинвесторцәеи, „Иҟаҵа Қырҭтәылаҿ" агәыҧи абри апроект азы ҭабуп ҳәа расҳәоит. „Қарҭли Текстиль" - аинвесторцәа инарыгӡо апроект ду „Аҷара Текстиль" анагӡара ауп. Уи Қырҭтәыла атерриториаҿы аҧшьбатәи наплакуп. Анеҩстәи ашықәс анҵәамҭазы аҵыхәтәантәи алҵшәа ҳауеит, абри анаплакы аҿы аусура иалагоит 4 нызқьҩык раҟара Русҭави инхо ауааҧсыра. Ҳара абри аҩыза аинвесторцәеи абри аҩыза анаплакқәа раартреи ҳацхраароуп", - иҳәеит Гьаргь Гахариа.
Аҧыза-министр ишазгеиҭаз ала, апандемиеи, аглобалтә проблемақәеи, аекономикатә кризиси, аамҭак иалагӡаны, макьана иҳацзаауеит.
„Иҟоу ақәҿиарақәа аабароуп, иаҳҳәап, аҵыхәтәантәи ҩымчыбжь рыла, аҧкрақәа рыбзоурала, авирус ҿызкааз ауаа рхыҧхьаӡара азҳара аанаҳкылеит, анеҩс, иҳармаҷит. Ҳтәылауаа зегьы ҭабуп ҳәа расҳәар сҭахуп аҧкратә уснагӡатәқәа ииашаны реилкаареи рынагӡареи азыҳәан, урҭ рыбзоурала иахьазы ҽнакала 1 000 - 1 500-ҩык иреиҳамкәа ачымазаҩцәа ҳзацлоит. Ҧаса есымша 5 000-ҩык раҟара иҟан. Араҟа ҳазынтәгьы иазҧхьагәаҳҭароуп аелементартә имариоу аҧҟарақәа рықәныҟәареи аусуратә ҭыҧқәа рыхьчареи рыбжьара ишиашоу аимадара шыҟоу. Шаҟа ирацәаны ауааҧсыра асабрадақәа рыҟәырго аҟара аусуратә ҭыҧқәагьы рацәахоит, ақырҭуа економика иаҳа ирласны еиҭашьақәгылоит. Абри ауп ҳара хықәкыс иҳамоу. Ҳбизнеси ҳинвесторцәеи ҭабуп ҳәа расҳәар сҭахуп, аха, аамҭакала ирдыруазар сҭахуп - ҳара азнеишьа ҿыц ҳамазароуп, даҽа епохак ҳҭагылоуп, акоронавирус анеҩстәи аекономикатә аиҭашьақәыргылара епоха, уи зынӡаскгьы даҽа процесск ауп. Рыцҳарас иҟалаз, лассы-лассы Қырҭтәылантә аҳәаанырцәынтә атауар аагара иаҳа имариоуп агәылара иҟоу адәқьан аҟынтә аинтернет ала амаҭәар аахәара аҵкыс.
Убри аҟынтә, аиҳабырагьы абизнесхаҭарнакцәагьы, ҳаицхырааны, абри аусгьы еиҿаҳкаароуп, раҧхьа иргыланы, аусуратә ҭыҧқәа рыхьчареи аҿыц ҭыҧқәа раҧҵареи, насгьы, аҵыхәтәаны, ҳтәылауаа рыҧсҭазаашьа аиҕьтәреи ҳазхәыцроуп. Ҳара,ҳ аидгыланы, аепидемиагьы, апандемиагьы ирхылҵыз акризиси аекономикатә кризиси ҳалҵуеит", - иҳәеит аиҳабыра рнапхгаҩы.
Қырҭтәыла Аҧыза-министри аекономикеи иҭышәынтәалоу аҿиареи рминистр Наҭиа Турнавеи „Қарҭли текстиль" анаплакы ҿыц рбеит.
Аҭырқәа инвестициа ала иаҧҵоу анаплакы аҿы аусура иалагоит Русҭавии Гардабании инхо 4 нызқьҩык ауааҧсыра. Анаплакы аусура иалаго ауааҧсыра рҟынтә 90% ҳәсацәоуп.
Аилахәыра „Қарҭли Текстиль", аӡахратә наплакы аргыларазы, аҳәынҭқарра аҟынтә, асимволтә ахә ала, 1 лари ҳәа аиуеит адгьылҭыҧи уи аҿы иҟаз аргыламҭақәеи. Анаплакы аҳәынҭқарратә программа „Иҟаҵа Қырҭтәылаҿ" аҳәаақәа ирҭагӡаны иаҧҵоуп. Анаплакы аргылара иазоушьҭын 20 миллион лари, абри аҧара аҟынтә 10 миллион лари апрограмма „Иҟаҵа Қырҭтәылаҿ" аҳәаақәа ирҭагӡаны иргаз аҧсахтә ауп.
Аилахәыра „Аҷара Текстиль" кыршықәса рыҩнуҵҟа адунеи еицырдыруа абрендқәа аус рыцыруеит, урҭ иреиуп Nike, ADIDAS, Lotto, Erima, New Balance, Under Armour. Аилахәыра 100%-ла аекспорт азы аус ауеит, шықәсык ала 15 000 000 цыра еиҳаны аалыҵ ҟаҵаны, аекспорт ашҟа идәықәырҵоит.
Аиҳaбырa рaдминистрaциa aпрессмaҵзурa