2024-04-25
Аҧыза-министр Орбан,
ҳаҭыр зқәу асасцәа, аҩызцәа,
Аконсервативтә политикатә инициатива аконференциаҿы шәара шәҿаҧхьа ақәгылареи аконференциа иалахәы ҳаҭыр ду зқәу асасцәа рахь ааҧхьара аҟаҵареи сара сзы ҳаҭыр дууп.
50 шықәса ҵит аконсервативтә политикатә инициатива раҧхьатәи аконференциа мҩаҧысижьҭеи, убасҟан ақәҧара атрадициатә принципқәа рыхьчаразы ашьаҭа ҕәҕәа иаҧҵан.
Аха, аҵыхәтәантәи аамҭазы иҟалаз, иара убас, иҟалар зылшо апроцессқәа ибзиаӡаны иаҳдырбоит ашәышықәсарацәалатә ҳтрадициақәеи ҳмилаҭтә принципқәеи рыхьчаразы аҽазышәара иаҳа ишырҕәҕәатәу.
Иахьа адунеитә аиҿкаара аҽеиҭанакуеит. Жәларбжьаратәи аҭагылазаашьа аҽаҧсахуеит, абарҭ апроблемақәа рыӡбаразы, ҳаиқәшаҳаҭны аус еицаауроуп. Иаҳзеиҧшу апринципқәа рыхьчара амзызла, аусеицура ҕәҕәа ала, ҳара абарҭ ахҭысқәа зегьы иҵоуроу ахырхарҭала рымҩаҧгара ҳалшоит.
Убри аҟынтә, иахьатәи аконференциа еиҿызкааз ауааҧсыра зегьы ҭабуп ҳәа расҳәар сҭахуп, избанзар, ари аконференциа иаҳзеиҧшу аперспективақәа рылацәажәаразы аплатформа бзиа ҳзеиҿнакааит.
Аҧсадгьыли, абызшәеи, адини IV ашәышықәса инаркны, ақьырсианра Қырҭтәыла амилаҭтә религиас ианыҟала инаркны Қырҭтәыла амилаҭтә хаҿсахьа аҧызҵо ахадаратә 3 ашьаҭак роуп.
Ҭоурыхла, ихәыҷу, аха, ахақәиҭра бзиа избо, ҳтәыла ҧагьа еснагь аимпериақәа рымҩеихысырҭаҿы ишьҭан. Ашәышықәсақәа рацәа рыҩныҵҟа ақырҭуаа, рхы иамеигӡакәа, рыҧсадгьыл ахьчара иазықәҧон.
Ашәышықәсақәа рацәа рыҩныҵҟа, ақырҭуаа, гәыкала рбызшәа рыхьчон. Аҵыхәтәаны, 1978 шықәсазы, ҳанацәеи ҳабацәеи рабиҧара ақырҭуа бызшәа ахьчаразы ҕәҕәала рҽеидыркылеит, усҟан асоветтә напхгара ақырҭуа бызшәа аҳәынҭқарратә бызшәа астатус аҧыхра рҽазыркит. Ажәлар реидгылара алҵшәа ахылҵит, асоветтә напхгара ахьаҵра рықәшәеит.
Ҳара, ақырҭуаа, ашәышықәсақәа рацәа рыҩныҵҟа ҳдинхаҵара, ақьырсианра ахьчара азықәҧара ҳақәшәеит. Аҭоурых иҳнарҵеит унапаҿы иааугаз ажәлар рмилаҭтә принципқәа рықәхра улымшар, иарбанзаалак ампыҵахалара аамҭалатәи аҟазшьа шамоу. Убри аҟынтә, ампыҵахалаҩцәа зегьы, раҧхьа иргыланы, ақырҭуа жәлар рдинхаҵара ақәхра рҽазыркуан. Аҵыхәтәаны уи ҟарҵон ауахәамақәа зырбгоз, адинхаҵаҩцәа аныҳәара азин рызымҭоз асоветтә большевикцәа. Аха, Қырҭтәыла, адинхаҵара ахьчара иазкыз ақәҧарақәа зегьы рҿы аиааира агеит, ақьырсианра ахьчареи аиқәырхареи рылшеит.
Иахьазы ҳтәыла аҿаҧхьа иқәгылоу аҳасабтәқәа ашәышықәсақәа рацәа ирылагӡаны иҟаз аҳасабтәқәа иреиҧшуп. Аха, иахьазы абарҭ апроблемақәа адунеи зегьы проблемас иазыҟалеит, амилаҭ хәыҷқәа реиҧшҵәҟьа, атәыла дуқәеи амилаҭ дуқәеигьы ашәарҭара иҭагылоуп.
Иахьа, алибералцәа адунеи зехьынџьара атәылақәеи амилаҭқәеи рмилаҭтә принципқәа ашәарҭара иҭадыргылоит. Зегьы реиҳа ашәарҭара иҭагылоуп алибералтә идеологиа аларҵәара ҕәҕәа ахьамоу Европеи Америкеи.
Хылаҧшрада имҩаҧысуа амиграциа европатәи атәылақәа ашәарҭара ду иҭанаргылеит. Апроцессқәа абри аҩыза аласрала инагӡахар, атәылақәа рацәа рҿы аҭыҧантәи ауааҧсыра амигрантцәа раасҭа акырӡа имаҷхоит.
Алибералцәа аентузиазм ҷыдала ақьырсианра иаҿагылоит. Алибералцәеи абольшевикцәеи акызаҵәык алоуп излеиҧшым - абольшевикцәа арелигиа аҿагыларазы ажьаҳәаду рхы иадырхәон, алибералцәа апропагандала ақьырсианра иаҿагылоуп, амедиа атоталтә хылаҧшра аныҟоу, абри аҩыза апропаганда ажьаҳәаду аасҭа амч амоуп. Дара ақырҭуа аиашахаҵаратә уахәама ҷыдала иажәылоит. Ҩбаҟа мшы раҧхьа, ақырҭуа либералцәа Қырҭтәыла амилаҭтә ҷыдарақәа рконцепциа аҧсахра рҽазыркын, ажәақәа - аҧсадгьыл, абызшәа, адин рыҧсахит ажәақәа - аҧсадгьыл, абызшәа, акзаара рыла. Амилаҭ рхадаратә принцип ианырхит ажәа адин.
Алибералцәа рконцепциала, атәылеи амилаҭи мацара ракәымкәа, хазы иҟоу ауаҩгьы ихатә ҷыдарақәа имазар ҟалом. Ауаҩы ихатә ҧсҭазаараҿы изакәызаалак аморалтә ҳәаак иҟамзароуп. Абри апропаганда Европагьы Америкагьы угәы ҧызжәаша алҵшәа ахылҵуеит. Асоциологиатә ҭҵаарақәа ишаҳнарбаз ала, Америкеи Европеи ртәылақәа реиҳара рҿы, 18-25 шықәса зхыҵуа ауааҧсыра рҟынтә 20 наӡына ЛГБТ ахаҿыс рхы аадырҧшуеит. 26-32 шықәса зхыҵуа ауаа рыгәҭа ари арбага хынтә имачуп, уи алагьы иубарҭоуп аҵыхәтәантәи бжьышықәса рыла абри апропаганда амшала ЛГБТ ахаҿқәа рхыҧхьаӡара хынтә ишазҳаз.
Алибералцәа рпозициа инақәыршәаны, ауаҩы агендертә дырга ҕәҕәа имамзароуп, иҧсҭазаара иарбанзаалак аетапаан иара ихала иӡбар илшоит дхаҵоу дыҧҳәысу. Ахәыҷқәагьы ахаҵара-ҧҳәысра алхреи аҧсахреи азин рымазароуп. Алибералцәа агендертә ганахьала иҳәаақәҵоу атерминқәа рхархәара иақәшаҳаҭым, иаҳҳәап, ан, аб, аҧҳәыс ма ахаҵа.
Жәабаҟа шықәса раҧхьа аӡәгьы ихахьы изааигомызт ацивилизациатә дунеиаҿ абарҭ азҵаарақәа рылацәажәара ҳақәшәоит ҳәа. Аха, иахьа лабҿаба иубарҭоуп ҳахшыҩ азышьҭны ари атема ҳшалацәажәо, уи еиҳангьы, даҽа позициак змоу ауаа ирышьҭацалоит, ҧаса абольшевикцәа аҟәышцәеи адоуҳатә хаҿқәеи ишрышьҭацалоз еиҧшҵәҟаьа.
Ахақәиҭра алаҧш хырҧагас зхы иазырхәо алибералцәа ауаҩытәыҩса изинқәа, ҷыдала ажәеи агәаанагара аарҧшреи ахақәиҭра рзычҳауам. Аиашаҵәҟаьа шәҭахызар, алибералцәа ахақәиҭреи анычҳареи закәу рзеилкаауам.
Абри азнеишьа анагӡароуп алибералцәа активла имҩаҧырго анаркополитика алиберализациа иазку акампаниа. Ари акампаниа Қырҭтәылагьы имҩаҧысуеит. Арҩышьыгақәа ахәыцра зылшо ауаҩы изакәызаалак принипк змам субиектс дҟарҵароуп.
Иара убас, алибералцәа атәыла апринцип хада, аҳәынҭқарратә хьыҧшымра иаҿагылоуп. Апроцессқәа иахьанӡагьы излацоз абри ахырхарҭала ацара нарыгӡар, иахьа дара амилаҭтәи арелигиатәи ҷыдарақәа раҧыхра ишазҿлымҳау еиҧшҵәҟаьа, хара имгакәа аҳәынҭқарратә хьыҧшымрагьы ишақәшаҳаҭым аарыцҳауеит.
Қырҭтәыла, иахьанӡагьы, ахатә амилаҭтәи арелигиатәи, иара убас, атрадициатәи аҷыдарақәеи апринципқәеи рыхьчара алшеит. Аха, иуадаҩӡоу апроблемақәа ҳамоуп. Алибералцәа ақырҭуа жәлар рыгәҭа рхатә аидеологиа аларҵәареи аҳәынҭқарреи ауаажәларри рышьаҭа арҧсыҽреи рҽазыркит.
Абарҭ апроблемақәа рыӡбаразы, ҳара, Қырҭтәыла апарламентаҿ ицәыраагеит аконституциатә ҧсахрақәа рпроект, уи аҭаацәаратә принципқәеи зықәра наӡам ринтересқәеи рыхьчара иазкуп. Азакәанпроект инақәыршәаны, ҩыџьа ахацәа ма ҩыџьа аҳәса реибагареи, дара рыла зықәра наӡам ҧас ма ҧҳас игареи, ауаҩы ихаҵара-ҧҳәысра аҧсахреи, ахаҭара зыршаҳаҭуа адокументаҿ ахаҵа ма аҧҳәыс ада уаҳа нҵамҭак аҟаҵареи, аинцести, ахаҵара-ҧҳәысра аҧсахра аӡыргареи ҟалом.
Абарҭ азакәанҧҵаратә ҧсахрақәа алибералтә идеологиа қәҿиарала иаҿагылап ҳәа ҳгәыҕуеит, ҳара агәра ганы ҳаҟоуп арҭ аҧсахрақәа аҭаацәаратә принципқәеи зықәра наӡам рзинқәеи рыхьчара ишацхраауа.
Атәылеи уи ауааҧсыреи ринтересқәа рыхьчара аганахьала Венгриа иҿырҧшыгоу апринципра ҕәҕәа аанарҧшит. Венгриа анапхгара, хаҭалаа аҧыза-министр Виктор Орбан, Венгриа амилаҭтәи арелигиатәи, атрадициатәи принципқәа рыхьчара рылшеит. Аҭагылазаашьа шыцәгьоугьы, шәара, шәтәыла амилаҭтә ҷыдара аиқәырхара амзызла, Венгриаҟа хылаҧшрада амигрантцәа рнеира қәҿиарала шәаҿагылеит. Шәара, ахәыҷқәеи аҿари рзы анырра цәгьа ыҟамзаарц азыҳәан алибералтә пропаганда ҕәҕәала шәаҿагылоит. Шәара Венгриа аҳәынҭқарратә хьыҧшымра ҕәҕәала ишәыхьчоит, уи атәыла амилаҭтә интересқәа рыхьчареи рымҩаҧгареи азыҳәан зда ҧсыхәа иҟам ҭагылазаашьоуп.
Венгриеи уи аиҳабыреи, хаҭала аҧыза-министр Виктор Орбангьы, ажәақәа аҧсадгьыли апатриотизми ҷыдала рыхә зшьо ауаа рзыҳәан иҿырҧшыгоуп.
Убри аҟынтә, иахьа абра аҟазаареи иаҳзеиҧшу апринципқәа рылацәажәареи сара сзы ҳаҭыр дууп.
Евроеидгыла алалара Қырҭтәылеи ақырҭуа жәлари рдәныҟа-политикатә аҧыжәара хадоуп. Агәра ганы сыҟоуп хара имгакәа Қырҭтәыла европатәи аҭаацәара алахәылас ишыҟало. Ҳара, ҳаидгыланы, Евроеидгыла арҕәҕәареи ашьаҟа ҕәҕәа ашьаҭала Европа аргылареи аус аҿы алагала ду ҟаҳҵар ҳалшоит. Анцәа сиҳәоит амч ҳаиҭарц, абри зҵакы дуу аус анагӡараҿы дҳацхраарц.
Даараӡа иҭабуп!