2008 წლის 19 აგვისტოს სასტუმრო ,,თბილისი მერიოტში" გაიმართა დონორებისადმი გაეროს მოწოდება-მიმართვის პრეზენტაცია, რომლის მიზანია 57 მილიონი აშშ დოლარის მობილიზება საქართველოსათვის გადაუდებელი ჰუმანიტარული დახმარების აღმოსაჩენად. დახმარება გათვალისწინებულია კონფლიქტის შედეგად დაზარალებული 129 000 ადამიანისათვის და გაგრძელდება ექვსი თვის განმავლობაში.
როგორც პრეზენტაციაზე გაეროს მუდმივმა კოორდინატორმა საქართველოში რობერტ უოტკინსმა განაცხადა, მოწოდება-მიმართვის შედეგად შემოსული თანხები შეავსებს საქართველოს მთავრობისა და საერთაშორისო ორგანიზაციების მიერ უკვე მობილიზებულ ფინანსებს.
დამატებითი სახსრები საჭიროა საკვების, წყლის, სანიტარიულ-ჰიგიენური საშუალებების, პირველადი მოხმარების საგნების შესაძენად, ასევე სამედიცინო მომსახურების გასაწევად და უსაფრთხოების გასაძლიერებლად.
შეხვედრის მსვლელობისას საქართველოს პრემიერ-მინისტრმა ვლადიმერ გურგენიძემ თანადგომისათვის მადლობა გადაუხადა ყველა დონორ ორგანიზაციას და იმედი გამოთქვა, რომ უახლოეს პერიოდში ასეთი ტიპის ჰუმანიტარული დახმარებები აღარ იქნება საჭირო. ,,ვიმედოვნებ, აღარ იარსებებს ისეთი გარემოება, რომელიც საქართველოს ტერიტორიაზე მცხოვრებ მოქალაქეებს ოდესმე შეუქმნის ასეთ გაუსაძლის პირობებს," - აღნიშნა საქართველოს პრემიერ-მინისტრმა.
საქართველოს მთავრობის კანცელარიის პრესცენტრი