12 აგვისტოს საქართველოს პრემიერ-მინისტრმა საგანგებო განცხადება გააკეთა, რომ რუსმა სამხედროებმა რამდენიმე საათის წინ ყულევის ტერმინალის თანამშრომლებს ურჩიეს, დაეტოვებინათ ტერმინალი. ამის მიზეზად რუსულმა მხარემ ის დაასახელა, რომ ახლომდებარე ტყის დაბომბვას აპირებენ, რადგან იქ ქართული შენაერთები იმყოფებიან. ყულევის ტერმინალი ეკუთვნის აზერბაიჯანულ სახელმწიფო კომპანია ,,Socar"-ს და პრემიერ-მინისტრის თქმით ის არის ყველაზე მსხვილი ინვესტიცია საქართველოში. ტერმინალის ინვესტიცია ასეული მილიონობით დოლარია. ამის გამო აზერბაიჯანული მხარე ძალიან შეშფოთებულია და აწარმოებს რუსეთთან მოლაპარაკებას, რათა არ მოხდეს ტერმინალის დაბომბვა.
გარდა ამისა, რუსი სამშვიდობოების განცხადებით ისინი აპირებენ ფოთის პორტში მდგარი სამი სამხედრო გემის აფეთქებას. თავდაპირველი განზრახვა იყო გემების აფეთქება უშუალოდ პორტის აკვატორიაში, რომელიც დიდი რისკის შემცველი იქნება პორტის ინფრასტრუქტურისათვის. ამიტომ გემებს გაიყვანენ ზღვაში, რათა მათი აფეთქების შედეგად პორტის ინფრასტრუქტურას არაფერი დაემუქროს, - განაცხადა ვლადიმერ გურგენიძემ.
პრემიერ-მინისტრის განმარტებით, ორშაბათს, 11 აგვისტოს, მიუხედავად საქართველოში შექმნილი მძიმე მდგომარეობისა, სახელმწიფო ბიუჯეტში შეტანილ იქნა 14 მილიონი ლარი. ეს ძალიან კარგი ინდიკატორია ეკონომიკური სიმტკიცისა.
ხვალ, 13 აგვისტოს, ბანკები ჩვეულებრივ რეჟიმში განაახლებენ მუშაობას.
საქართველოს მთავრობის კანცელარიის პრესცენტრი