2008 წლის 11 აგვისტოს გვიან ღამით საქართველოს პრემიერ-მინისტრმა ვლადიმერ გურგენიძემ საზოგადოებრივი მაუწყებლის ეთერით მოსახლეობას მიმართა.
პრემიერ-მინისტრმა საქართველოს მოსახლეობას მადლობა გადაუხადა სიმშვიდის შენარჩუნებისათვის და ყველას მოუწოდა საკუთარ სახლებში დაელოდნენ მოვლენების განვითარებას.
- ,,მადლობა მინდა გითხრათ იმისათვის, რომ ინარჩუნებთ სიმშვიდეს, არ არის პანიკა და აჟიოტაჟი. ეს ჩვენთვის ამ ეტაპზე ყველაზე მნიშვნელოვანია. კიდევ ერთხელ მინდა ყველას მოგიწოდოთ მშვიდად, დინჯად საკუთარ სახლებში დაეოლოდოთ მოვლენების განვითარებას.
საქართველოს პრეზიდენტი ესაუბრება მსოფლიოს ლიდერებს, სხვადასხვა ქვეყნების ხელმძღვანელებს. მე მაქვს ინფორმაცია, რომ რამდენიმე მათგანი აპირებს ჩამოსვლას უახლოეს დღეებში სოლიდარობის ნიშნად და დახმარების გასაწევად. თუმცა გულწრფელად უნდა ვთქვათ, რომ ჩვენ ამ ეტაპზე იმედგაცრუებული ვართ, რადგან ვერ მოხერხდა დასავლელი პარტნიორების ქმედითი ჩარევა სიტუაციის განსამუხტად.
მიუხედავად იმისა, რომ დედაქალაქსა და ქვეყნის სხვა რეგიონებში სიწყნარეა, მივიღეთ გადაწყვეტილება, რომ ხვალინდელი დღე ბანკებისთვის გამოვაცხადოთ დასვენების დღედ, რათა თავიდან ავიცილოთ ზედმეტი აჟიორაჟი. მოგეხსენებათ, რომ ჩვეულ რეჟიმში იმუშავა ყველა ბიზნესმა საქართველოში, მათ შორის ბანკებმა. ისინი მზად იყვნენ ჩვეული მუშაობის გაგრძელებისათვის, მაგრამ, ჩვენ მივიღეთ ეს გადაწყვეტილება.
პანიკის არავითარი საფუძველი არ არსებობს. ჩვენს ხელთ არსებული ინფორმაციით, არ შეინიშნება რუსეთის ჯარების გადაადგილება არც აღმოსავლეთით და არც სხვა ქალაქების მიმართულებით, გარდა იმ ქალაქებისა, სადაც ისინი (რუსები) დღეს იმყოფებიან. თუმცა აქტიურ მოქმედებებზე არ გადადიან. ჩვენი მონაცემებით სახმელეთო შეტევის საშიშროება დღეს ღამით თბილისზე არ არის.
სახელმწიფო დაწესებულებები იმუშავებენ ჩვეულებრივ რეჟიმში, ბანკებს ექნებათ ერთდღიანი დასვენება გამოცხადებული, ვიმეორებ, მხოლოდ ერთდღიანი დასვენება.
როგორც დაგპირდით, მუდმივ რეჟიმში, საათში ერთხელ, თუ ამის საჭიროება იქნება, მოგაწვდით დამატებით ინფორმაციას.
გმადლობთ კიდევ ერთხელ სიმშვიდის შენარჩუნებისთვის," - განაცხადა საქართველოს პრემიერ-მინისტრმა.
საქართველოს მთავრობის კანცელარიის პრესცენტრი