8 აგვისტოს საქართველოს პრემიერ-მინისტრმა ვლადიმერ გურგენიძემ ვაზიანის სამხედრო ბაზაზე მობილიზებული რეზერვისტები მოინახულა.
ვლადიმერ გურგენიძემ რეზერვისტებს წარმატებები უსურვა და განაცხადა, რომ საქართველოს ყველა ქალაქში არის სრული სიმშვიდე და წყნარი ვითარება, რადგანაც საქართველოს ყველა მოქალაქემ იცის, რომ ქვეყანას ჰყავს პროფესიული, კარგად გაწვრთნილი, მოტივირებული და კარგად შეიარაღებული ჯარი და, აგრეთვე, კარგად გაწვრთნილი და მოტივირებული რეზერვისტები.
პრემიერ-მინისტრმა რეზერვისტებისადმი მიმართვისას განაცხადა: ,,თქვენ, და თქვენი თანამებრძოლები დღეს ჩვენს სიმშვიდეს, სიწყნარეს, ჩვენი ცხოვრების წესს, ჩვენი ქვეყნის მთლიანობას და ჩვენი ქვეყნის ხვალინდელ და ზეგინდელ დღეს იცავთ. ჩვენთვის ძვირფასია ყოველი ადამიანის სიცოცხლე, ყოველი თქვენთაგანის სიცოცხლე და, რა თქმა უნდა, ყოველი მშვიდობიანი მოსახლის სიცოცხლე, განურჩევლად მათი ეთნიკური წარმომავლობისა. მე მინდა გისურვოთ ღირსეულად იმსახუროთ. ეს მობილიზება ყოფილიყოს რაც შეიძლება ხანმოკლე, რათა რაც შეიძლება მალე დაუბრუნდეთ თქვენს ოჯახებს. ჩვენ არ გვყავს დასაკარგი არც ერთი ადამიანი, არც ერთი პატრიოტი.
ღმერთი იყოს თქვენი მფარველი! "
საქართველოს მთავრობის კანცელარიის პრესცენტრი