უკანასკნელი საათების განმავლობაში სეპარატისტებმა განახორციელეს სამხედრო თავდასხმა რეგიონის სოფლების მშვიდობიანი მოსახლეობისა და სამშვიდობო ძალების წინააღმდეგ, რამაც მდგომარეობის უკიდურესი ესკალაცია გამოიწვია.
ცეცხლის ცალმხრივი შეწყვეტის და საქართველოს პრეზიდენტის მიერ სამშვიდობო მოლაპარაკებების შეთავაზების საპასუხოდ, სეპარატისტებმა განახორციელეს თავდასხმა ცხინვალის ახლომდებარე სოფლებზე. იერიში 22:30 სთ-ზე მიტანილ იქნა ჯერ სოფელ ფრისზე, შემდეგ 23:30 სთ-ზე სოფელ თამარაშენზე. განხორციელდა როგორც სამშვიდობო ძალების პოზიციების, ისე მშვიდობიანი მოსახლეობის მასირებული დაბობმვა. შეტევის შედეგად არიან დაჭრილები და დაღუპულები.
არსებული მონაცემების თანახმად, როკის გვირაბის გავლით რუსეთ-საქართველოს საზღვარი გადმოლახა ასობით შეიარაღებულმა პირმა და სამხედრო ტექნიკამ.
მშვიდობიანი მოსახლეობის უსაფრთხოების უზრუნველსაყოფად და შეიარაღებული თავდასხმის აღსაკვეთად, საქართველოს ხელისუფლება იძულებული გახდა მიეღო ადეკვატური ზომები.
მიუხედავად გამწვავებული ვითარებისა, საქართველოს მთავრობა კვლავ ადასტურებს თავის მზადყოფნას კონფლიქტის მშვიდობიანი მოგვარებისათვის და მოუწოდებს სეპარატისტებს შეწყვიტონ შეიარაღებული მოქმედებები და მიუსხდნენ მოლაპარაკებების მაგიდას.
