საქართველოს მთავრობის კანცელარიის უფროსმა კახა ბენდუქიძემ მონაწილეობა მიიღო საერთაშორისო საზაფხულო სკოლის მუშაობაში, რომელიც ბაკურიანში 7-13 ივლისს ტარდებოდა.
ეს იყო ეკონომიკურ მეცნიერებათა ევროპული ინსტიტუტისა და კატონის ინსტიტუტის, ფრიდრიხ ნაუმანის ფონდის, ახალი ეკონომიკური სკოლა - საქართველოსა და თბილისის თავისუფალი უნივერსიტეტის ახალი პროექტი - საერთაშორისო ინტერ-დისციპლინარული საზაფხულო სკოლა.
სასწავლო პროგრამა მთლიანად მიეძღვნა ეკონომისტების, ფილოსოფოსებისა და ისტორიკოსების მიერ ეკონომიკური თავისუფლების ანალიზს.
11 ივლისს კახა ბენდუქიძემ საერთაშორისო საზაფხულო სკოლის აუდიტორიის წინაშე წაიკითხა ლექცია, რომელიც საქართველოში 2004-2008 წლებში განხორციელებულ რეფორმებს შეეხებოდა. მათ შორის ენერგეტიკის, განათლების, ფინანსური სექტორის, სამეწარმეო გარემოს გაუმჯობესების, ჯანდაცვისა და სხვა სფეროებში განხორციელებულ და მიმდინარე რეფორმებს.
კახა ბენდუქიძის თქმით, მიუხედავად იმისა, რომ საკმაოდ მნიშვნელოვანი ცვლილებები განხორციელდა, რეფორმების პროცესი უნდა გაგრძელდეს.
- ,,კიდევ ბევრია გასაკეთებელი საპენსიო უზრუნველყოფის, საშუალო განათლების, ბუნებრივი რესურსებით სარგებლობისა თუ სასამართლო სისტემის დახვეწისა და რეფორმიერების პროცესში. თუმცა, რეფორმების წარმატება დიდად არის დამოკიდებული საქართველოს მოქალაქეთა ცნობიერებასა და ადამიანების მოქალაქეობრივ აზროვნებაზე, ცალკე მთავრობა, ხალხის მხარდაჭერის გარეშე, ვერაფერს გახდება", - აღნიშნა კახა ბენდუქიძემ.
საერთაშორისო საზაფხულო სკოლის მუშაობაში მონაწილეობა მიიღეს ცნობილმა პროფესორებმა მსოფლიოს სხვადასხვა ქვეყნიდან. კერძოდ: კოლინ გენლი (ეკონომისტი, ისტორიკოსი, ოქსფორდის უნივერსიტეტის პროფესორი, ოქსფორდის უნივერსიტეტის ისტორიკოსთა საზოგადოების ჟურნალის რედაქტორი); ბუდევინ ბუკარტი (სამართალმცოდნე, გენტის უნივერსიტეტის სამართლის თეორიისა და ისტორიის ფაკულტეტის დირექტორი); პიერ გარელო (ეკონომისტი, ეკონომიკურ მეცნიერებათა ევროპული ინსტიტუტის დირექტორი და ეკონომიკურ და ფისკალურ საკითხებზე კვლევების ინსტიტუტის (IREF) კვლევათა დირექტორი, ერამუსის სამართლისა და ეკონომიკის პროგრამის კოორდინატორი პოლ სეზანის უნივერსიტეტში, საფრანგეთი); ჯეიმს ტეილორი (ფილოსოფოსი, პერსონალური ავტონომია: ახალი თემები (კემბრიჯის უნივერსიტეტის გამომცემლობა) რედაქტორი); პაატა შეშელიძე (ახალი ეკონომიკური სკოლა - საქართველო, პრეზიდენტი) და გია ჯანდიერი (ახალი ეკონომიკური სკოლა - საქართველო, ვიცე-პრეზიდენტი).
საქართველოს მთავრობის კანცელარიის პრესცენტრი