27 ივნისს სასტუმრო ,,ქორთიარდ მარიოტში" გაეროს განვითარების პროგრამამ (UNDP) წარმოადგინა ჰუმანური განვითარების საქართველოს ანგარიში „რეფორმები და რეფორმების მიღმა". პრეზენტაციას დაესწრო საქართველოს პრემიერ-მინისტრი ვლადიმერ გურგენიძე.
,,საქართველოში განხორციელებულ რეფორმებს ჩვენი ანგარიში ჩვეულებრივი ქართველის პოზიციიდან განიხილავს", - ნათქვამია 2008 წლის ანგარიშში.
ანგარიშის მიზანია დაეხმაროს საქართველოს მთავრობას ისეთი პოლიტიკის შემუშავებაში, რომელიც ეკონომიკური განვითარების ადამიანურ განზომილებასაც გაითვალისწინებს. ,,იმედი გვაქვს, რომ უკვე მიღწეულ წარმატებებზე დაყრდნობით ხელს შევუწყობთ საქართველოს საზოგადოების იმ სფეროების გაუმჯობესებას, რომელიც ჯერ კიდევ დამატებით ყურადღებას საჭიროებს", - განაცხადა UNDP მუდმივმა წარმომადგენელმა რობერტ უოთკინსმა.
ანგარიში იკვლევს უკანასკნელი წლების მანძილზე განხორციელებული რეფორმების გავლენას ჩვეულებრივი ადამიანების, განსაკუთრებით კი, სიღარიბის ზღვარს ქვემოთ მყოფი მოსახლეობის ცხოვრებაზე. გატარებული რეფორმების შეფასება ხდება ეფექტურობის, სამართლიანობისა და მდგრადობის კრიტერიუმების მიხედვით. ანგარიში მოიცავს შემდეგ ძირითად სფეროს: ეკონომიკას, განათლებას, ჯანდაცვას, გარემოს დაცვას. ენერგეტიკასა და სამართალდაცვას.
ჰუმანური განვითარების წლიური ანგარიში ასახავს მთელს მსოფლიოში არსებულ ვითარებას. ეროვნული ანგარიშები ეხება ცალკეული ქვეყნებისათვის დამახასიათებელ საკითხებს. 1992 წლიდან UNDP-ის ხელშეწყობით 130 ქვეყანაში გამოიცა 580 ეროვნული ანგარიში. საქართველოში ეროვნული ანგარიში 2002 წელს გამოქვეყნდა, რომელიც ეხებოდა სიღარიბის საკითხებს.
საქართველოს მთავრობის კანცელარიის პრესცენტრი