საქართველოს მთავრობის 2008 წლის 4 ივნისის №377 განკარგულების თანახმად სოციალურად დაუცველი ოჯახების მონაცემთა ერთიანი ბაზის მეთოდოლოგიისა და ადმინისტრირების სქემის სრულყოფის მიზნით საქართველოს შრომის, ჯანმრთელობისა და სოციალური დაცვის სამინისტროს დაევალა უზრუნველყოს საჭირო მომსახურების შესყიდვა.
10 ივნისს საქართველოს მთავრობის კანცელარიის საზოგადოებასთან ურთიერთობის დეპარტამენტის ინიციატივით მოეწყო შეხვედრა ,,სოციალურად დაუცველი ოჯახების მონაცემთა ერთიანი ბაზის" განმსაზღვრელ კომისიასთან და სოციალური მომსახურებისა და კულტურის საქალაქო სამსახურთან. უპირველეს ყოვლისა, ურთიერთინფორმირებისა და სამომავლო თანამშრომლობის გაღრმავების თვალსაზრისით. სოციალური სუბსიდიების სააგენტოს დირექტორი ანდრია ურუშაძე და სოციალური სუბსიდიების სააგენტოს საინფორმაციო ბანკის უფროსი აკაკი დანელია ინტერესით გაეცნენ იმ პრეტენზიებს, რომელიც მეტწილად ისმის მოსახლეობის მხრიდან მათი საქმიანობის შესახებ.
მათ ვრცლად ისაუბრეს სიღარიბის ზღვარს მიღმა მყოფი ოჯახების შემოწმების წესზე, მის ეფექტიანობაზე, დადებით და უარყოფით მხარეებზე, იმ ხარვეზებზე, რაც გამოჩნდა პროგრამის მიმდინარეობისას და მათი გამოსწორების გზებზე. აღმოჩნდა, რომ ამ სოციალური პროგრამით სარგებლობს და სხვადასხვა სახის დახმარებებს იღებს საქართველოს მოსახლეობის 60%-ზე მეტი. პროგრამის მიმდინარეობისას ცდომილებამ შეადგინა 15%, რაც ამ სახეობის პროგრამებისთვის იდეალურთან მიახლოებული ცდომილებაა. მიუხედავად ამისა, დაგეგმილია ფართომასშტაბიანი კვლევის ჩატარება და მის შედეგებზე დაფუძნებით მოხდება შეფასების სკალის გადახედვა. თუმცა, როგორც ბატონმა ანდრიამ აღნიშნა, ეს პროცესი საკმაოდ გრძელვადიანია და საბოლოო სახეს მხოლოდ წელიწადნახევრის შემდეგ მიიღებს.
სოციალური მომსახურებისა და კულტურის საქალაქო სამსახურის უფროსმა მამუკა ქაცარავამ მოგვაწოდა ინფორმაცია მერიის მიერ გნხორციელებული პროექტის ,,სოციალური სახლის" შესახებ და აღნიშნა, რომ იქმნება კომისია, რომლის მიზანია შეარჩიოს ის 28 ოჯახი, ვინც იცხოვრებს ამ სოციალურ სახლში და მისი სურვილია, რომ მთავრობის კანცელარია უფრო აქტიურად ჩაერთოს კომისიის მუშაობაში.
საზოგადოებასთან ურთიერთობის დეპარტამენტი