19 მაისს საქართველოს პრემიერ-მინისტრი ვლადიმერ გურგენიძე და ეკონომიკური განვითარების მინისტრი ეკატერინე შარაშიძე იმ მეწარმეებს შეხვდნენ, რომლებმაც ისარგებლეს პროგრამა ,,იაფი კრედიტით".
შეხვედრაზე შეჯამდა პროგრამის პირველი ეტაპის შედეგები.
პროგრამის მიზანია სოფლის მეურნეობის განვითარება, ექსპორტის ზრდისა და დივერსიფიკაციის ხელშეწყობა, რეგიონალური ტურიზმის და ხალხური რეწვის განვითარება, ასევე ახალი სამუშაო ადგილების შექმნა.
ამ ეტაპზე შემოსულია 1082 განაცხადი, რომელთა მთლიანი ღირებულება 320 მილიონ ლარს შეადგენს. მთავრობის მიერ საქართველოს ყველა რეგიონისათვის დამტკიცებულია 21 მილიონი ლარის სესხი, ამათგან უკვე გაცემულია 8,7 მილიონი ლარი, ხოლო 12,3 მილიონი ლარი გასაცემად მზადდება. აღნიშნული პროექტების რეალიზების შედეგად დასაქმდება დაახლოებით 30 500 კაცი.
,,უნდა აღინიშნოს, რომ ,,იაფი კრედიტის" პროგრამა ძალიან წარმატებული და პოპულარული აღმოჩნდა. 1000-ზე მეტი განაცხადი შემოვიდა, ეს მოწმობს იმ სამეწარმეო ენერგიასა და ინიციატივას, რომელსაც ჩვენს ქვეყანაში იჩენენ. ბუნებრივია, ყველა განაცხადის დაკმაკოფილება შეუძლებელია, მათი შინაარსისა და სხვა მახასიათებლებიდან გამომდინარე. ამ ეტაპზე დავამტკიცეთ დაახლოებით 21 მილიონი ლარის სესხი.
დღეს თქვენთან ერთად მინდა განვიხილო პროგრამის განვითარების და მომავალში მისი კიდევ უფრო გაფართოების დეტალები," - განაცხადა პრემიერ-მინისტრმა.
საქართველოს მთავრობის კანცელარიის პრესცენტრი