15 მაისს საქართველოს პრემიერ-მინისტრი ვლადიმერ გურგენიძე რუსთავში მსხვილი საწარმოების წარმომადგენლებს შეხვდა. ილაპარაკეს კადრების გადამზადების და ახალი სამუშაო ადგილების შექმნის შესახებ. პრემიერ-მინისტრის შეფასებით, შეინიშნება დინამიკა და საწარმოების უმეტესობა გაფართოებას აპირებს: ,,ბევრი საწარმო უკვე მუშაობს ექსპორტზე და აპირებს წარმოებული პროდუქციის გაოთხმაგებას. პირველ რიგში, მინდოდა გავცნობოდი იმ პრობლემებს, რომელთა მოგვარება ცენტრალურ ხელისუფლებას შეუძლია. როგორც გაირკვა რუსთავში ინდუსტრიული ზონის განვითარების სერიოზული ხელის შემშლელი ფაქტორები არ არსებობს," - აღნიშნა პრემიერ-მინისტრმა.
ვლადიმერ გურგენიძემ ასევე ილაპარაკა პროგრამა ,,იაფი კრედიტის" შესახებ და განაცხადა, რომ ,,იაფი კრედიტი" კარგად მოერგო ქვემო ქართლის რეგიონს, მათ შორის რუსთავს: ,,პროგრამის ფარგლებში ქვემო ქართლის რეგიონისათვის დამატებით გამოიყო 5 მილიონი ლარი. კვლავ გრძელდება განაცხადების მიღება და მათი განხილვა. ქვეყნის მასშტაბით უკვე განხილულია 1000-ზე მეტი განაცხადი."
საქართველოს მთავრობის კანცელარიის პრესცენტრი