14 მაისს საქართველოს პრემიერ-მინისტრი ვლადიმერ გურგენიძე თელავში ჩავიდა, სადაც ვაზიანი-გომბორი-თელავის საავტომობილო მაგისტრალის რეაბილიტაციის პროექტის პრეზენტაციას დაესწრო.
საავტომობილო მაგისტრალის რეაბილიტაცია 2 კვირაში დაიწყება. მთლიანად გარემონტდება გზის 94-კილომეტრიანი მონაკვეთი. შედეგად, მანძილი თელავიდან თბილისამდე 41 კილომეტრით შემცირდება. ამ პროექტის განსახორციელებლად სახელმწიფო 60 მილიონი დოლარის საინვესტიციო კაპიტალის ჩადებას გეგმავს. სამუშაოები, სავარაუდოდ, 2 წელიწადში დასრულდება და იქ 5000-მდე ადგილობრივი მოსახლე დასაქმდება.
- ,,ამ პროექტს დიდი მნიშვნელობა აქვს რეგიონის ეკონომიკის განვითარებისთვის, ასევე რეგიონის ტურისტული პოტენციალის სრულად გამოყენებისათვის. აღსანიშნავია ისიც, რომ შეიქმნება ახალი სამუშაო ადგილები და შემცირდება მანძილი თბილისამდე - თელავიდან თბილისში ჩასვლა 45 წუთში იქნება შესაძლებელი", - განაცხადა ვლადიმერ გურგენიძემ.
საქართველოს პრემიერ-მინისტრი თელავში ადგილობრივ მოსახლეობასაც შეხვდა და მათ პრობლემებს გაეცნო. ისინი მთავრობის მეთაურს, ძირითადად, დასაქმებას და სოციალური პრობლემების მოგვარებას სთხოვდნენ.
საქართველოს მთავრობის კანცელარიის პრესცენტრი