13 მაისს საქართველოს პრემიერ-მინისტრი ვლადიმერ გურგენიძე ბორჯომის მუნიციპალიტეტში იმყოფებოდა. თავდაპირველად მან სოფელ რველში გაზსადენზე მიმდინარე სამუშაოები დაათვალიერა. ითქვა, რომ წლის ბოლომდე მოხდება მთელი სოფლის გაზიფიცირება.
შემდეგ, ვლადიმერ გურგენიძემ, პროგრამა ,,ჩემი პირველი კომპიუტერის" ფარგლებში, ბორჯომის №1 საჯარო სკოლაში წარჩინებული მოსწავლეები პერსონალური კომპიუტერებით დააჯილდოვა, სკოლას კი სპორტული ინვენტარის ახალი კომპლექტი გადასცა.
1 100 ლარის ღირებულების სპორტული ინვენტარის პაკეტში შედის: კალათბურთის, ფეხბურთის, ფრენბურთის და რაგბის ბურთები, ფრენბურთის ბადე, ფეხბურთის კარის ბადე, კრივის ხელთათმანი და ტომარა, სავარჯიშო ლეიბი და სხვა.
მოგვიანებით, ბორჯომის კულტურის სახლში საქართველოს პრემიერ-მინისტრი ადგილობრივ მოსახლეობას შეხვდა და რაიონში არსებულ პრობლემებს გაეცნო. ,,აქაც, ისე როგორც საქართველოს ყველა რეგიონში არის პრობლემები. ჩვენ თანმიმდევრულად ვეცნობით ამ პრობლემებს და მაქსიმალურად ვცდილობთ მათ გადაჭრას. ცენტრალური ხელისუფლების დახმარებით, ადგილობრივი თვითმმართველობის ორგანოების მიერ რაიონში ძალიან ბევრი რამ კეთდება. ბუნებრივია, გასაკეთებელი ბევრად მეტია, არის წყლის მიწოდების პრობლება, აღსადგენია საკურორტო ინფრასტრუქტურა და მრავალი სხვა რამ", - განაცხადა ვლადიმერ გურგენიძემ.
საქართველოს მთავრობის კანცელარიის პრესცენტრი