10 მაისს საქართველოს პრემიერ-მინისტრი ვლადიმერ გურგენიძე რაჭაში იმყოფებოდა. თავდაპირველად იგი ამბროლაურში ჩავიდა და პროგრამა ,,ჩემი პირველი კომპიუტერის" ფარგლებში №2 საჯარო სკოლის წარჩინებულ მოსწავლეებს პერსონალური კომპიუტერები გადასცა.
ამბროლაურიდან ვლადიმერ გურგენიძე სოფელ ხვანჭკარაში გაემგზავრა, სადაც ადგილობრივ მოსახლეობას შეხვდა. მისი თქმით, წელს რთველი, გასულ წელთან შედარებით, განსხვავებული იქნება და ყურძენსაც რეალური ფასი დაედება: ,,ისევე როგორც კახეთში, აქაც დავპირდით მოსახლეობას, რომ წლევანდელი რთველი ჩატარდება ყველაზე ორგანიზებულად, აჟიოტაჟის და ემოციური ფონის გარეშე. რთვლის შემდეგ არც ერთ გლეხს არ დარჩება უსამართლობის გრძნობა," - განაცხადა ვლადიმერ გურგენიძემ.
საქართველოს მთავრობა გეგმავს, რთვლის პერიოდში დახმარება გაუწიოს არა მეღვინეებს, არამედ გლეხებს.
ამასთან, პრემიერ-მინისტრის რაჭაში ყოფნის დროს ცნობილი გახდა, რომ ურავის დარიშხანის საწარმოში ახალი ინვესტორი შემოდის.
პრემიერ-მინისტრთან ერთად რაჭაში იმყოფებოდა სოფლის მეურნეობის მინისტრი ბაკურ კვეზერელი.
საქართველოს მთავრობის კანცელარიის პრესცენტრი