7 მაისს საქართველოს პრემიერ-მინისტრი ვლადიმერ გურგენიძე ქუთაისში იმყოფებოდა. მან პროგრამა ,,ჩემი პირველი კომპიუტერის" ფარგლებში ქუთაისის აკაკი წერეთლის სახელობის №1, იოსებ ოცხელის სახელობის №2 და წმინდა ნინოს სახელობის №3 საჯარო სკოლების წარჩინებულ მოსწავლეებს საჩუქრად პერსონალური კომპიუტერები გადასცა.
პროგრამა ,,ჩემი პირველი კომპიუტერის" მიხედვით, პერსონალური კომპიუტერები საჩუქრად გადაეცემათ 2006-2007 სასწავლო წლის მეათე და მეთერთმეტეკლასელ წარჩინებულ მოსწავლეებს.
პროგრამა ხორციელდება საქართველოს მთავრობის 50-დღიანი სამოქმედო გეგმის ფარგლებში, რაც განათლების კუთხით დაგეგმილი ერთ-ერთი მნიშვნელოვანი ღონისძიებაა.
- ,,მოხდება საქართველოს ყველა სკოლის კომპიუტერიზაცია, იქნება ინტერნეტი და ყველა სხვა საჭირო ინფრასტრუქტურა. ამასთან, პედაგოგებისათვის ვქმნით უკეთეს პირობებს - უკვე განხორციელდა პედაგოგების დაზღვევის პროგრამა, განათლებისა და მეცნიერების სამინისტრომ გამონახა საშუალება, რომ პედაგოგებმა ე.წ. მეცამეტე ხელფასი მიიღონ აკადემიური წლის დასრულებისთანავე, მაისში და არა კალენდარული წლის ბოლოს, როგორც ეს ადრე ხდებოდა. ყველა ღონეს ვიხმართ საიმისოდ, რომ პედაგოგებს შრომა დაუფასდეთ", - განაცხადა პრემიერ-მინისტრმა.
პროგრამა ,,ჩემი პირველი კომპიუტერის" ფარგლებში ქუთაისში სულ 350 წარჩინებულ მოსწავლეს გადაეცემა პერსონალური კომპიუტერები.
საქართველოს მთავრობის კანცელარიის პრესცენტრი