მილტონ ფრიდმანის პრიზი თავისუფლების გავრცელებისათვის და 500 000 დოლარი მიენიჭა 23 წლის სტუდენტს ვენესუელიდან იონ გოიკოჩეას. იონ გოიკოჩეას ბრძოლის შედეგად ვენესუელის მოსახლეობამ მხარი არ დაუჭირა პრეზიდენტ უგო ჩავესის მიერ შემოთავაზებულ საკონსტიტუციო ცვლილებებს, რომლებითაც ფართოვდებოდა პრეზიდენტის უფლებამოსილება და უქმდებოდა პრეზიდენტობის ორი ვადით შეზღუდვა.
ეს გადაწყვეტილება მიიღო საერთაშორისო კომიტეტმა, რომელშიც შედიან: კახა ბენდუქიძე - საქართველოს მთავრობის კანცელარიის უფროსი, ედუარდ ქრეინი - კატონის ინსტიტუტის პრეზიდენტი; ფრანჩისკო გილ დიასი - მექსიკის ფინანსთა ყოფილი მინისტრი; როუზ ფრიდმანი - მილტონ ფრიდმანის ქვრივი; კარენ ჰორნი - გერმანიის ეკონომიკის ინსტიტუტის დირექტორი; ჩარლზ კოხი - Koch Industries-ის დირექტორი; ენდრიუ მიუენდა - ადვოკატთა კოალიცია უგანდას განვითარებისათვის, მკვლევარი; მარი ანასტასია ო'გრეიდი - Wall Street Journal-ის რედაქტორი; ფარიდ ზაქარია - Newsweek International-ის რედაქტორი.
წინა წლებში საერთაშორისო ჟიურის წევრები იყვნენ მარგარეტ ტეტჩერი - ბრიტანეთის პრემიერ-მინისტრი, ვასლავ კლაუსი - ჩეხეთის რესპუბლიკის პრეზიდენტი, ფრედერიკ სმიტი - კორპორაცია ფედექსის დირექტორი.
მილტონ ფრიდმანის პრიზი თავისუფლების გავრცელებისათვის 500 000 აშშ დოლარი იონ გოიკოჩეას საზეიმოდ გადაეცემა. 15 მაისს ნიუ-იორკში, სასტუმრო უოლდორფ-ასტორიაში. ცერემონიალში მონაწილეობას კახა ბენდუქიძე მიიღებს.
ეს პრიზი ნობელის პრემიის ლაურეატმა მილტონ ფრიდმანმა და მისმა მეუღლემ როუზ ფრიდმანმა დააარსეს. პრიზი ორ წელიწადში ერთხელ გადაეცემა პირს, რომელმაც განსაკუთრებული წვლილი შეიტანა ინდივიდუალური, პოლიტიკური თუ ეკონომიკური თავისუფლებისა განვითარებაში. ფრიდმანის პრიზის მიიღეს ბრიტანელმა ეკონომისტმა პიტერ ბაუერმა (2002), პერუელმა ეკონომისტმა ერნანდო დე სოტომ (2004) და ესტონეთის ყოფილმა პრემიერ-მინისტრმა მარტ ლაარმა (2006).
საერთაშორისო კომიტეტის წევრის კახა ბენდუქიძის თქმით, ,,აქამდე, მილტონ ფრიდმანის პრიზს იღებდნენ ისინი, ვინც განსაკუთრებული წვლილი შეიტანა ეკონომიკური თავისუფლების გავრცელებაში. ადამიანის უფლებები და პირადი თავისუფლება არანაკლებ მნიშვნელოვანია. ჭეშმარიტი ეკონომიკური თავისუფლება მხოლოდ დემოკრატიულ ქვეყანაში მიიღწევა. ჩვენ იონ გოიკოჩეა ავარჩიეთ არა მხოლოდ იმიტომ, რომ იგი იბრძოდა ავტორიტარიზმის, ადამიანის უფლებების შელახვის წინააღმდეგ - სხვა კანდიდატებიც ასევე თავდადებულად იბრძოდნენ ადამიანის უფლებების დასაცავად - არამედ იმიტომ, რომ მან შედეგს მიაღწია. მისი ბრძოლის შედეგად ჩავესმა ვერ შესძლო თავისი დიქტატურის განმტკიცება"
საქართველოს მთავრობის კანცელარიის პრესცენტრი