1 მაისს საქართველოს პრემიერ-მინისტრი ვლადიმერ გურგენიძე თეთრი წყაროს მუნიციპალიტეტს ეწვია და თეთრი წყაროს №1 საჯარო სკოლა მოინახულა. სკოლის რეაბილიტაცია ახლახანს დასრულდა და იქ 300-ზე მეტი მოსწავლე სწავლობს.
- „ეს არის მნიშვნელოვანი ობიექტი, რომლის სრული რეაბილიტაცია ჩვენ მოვასწარით. საქართველოში ორ-სამ წელიწადში არ დარჩება არც ერთი სკოლა, რომელიც თანამედროვე სტანდარტებს არ უპასუხებს. გარდა ამისა, „ჩემი პირველი კომპიუტერის" პროგრამის ფარგლებში ამ სკოლის 8 წარჩინებულ მოსწავლეს დღეს გადავეცით პრეზიდენტის საჩუქარი - პერსონალური კომპიუტერები", - განაცხადა პრემიერ-მინისტრმა.
პროგრამა ,,ჩემი პირველი კომპიუტერი" უზრუნველყოფს სწავლის წახალისებას წარჩინებულ მოსწავლეთა მხარდაჭერის გზით, ასევე სასწავლო გარემოს მოდერნიზაციასა და თანამედროვე სტანდარტებთან მისადაგებას.
პრემიერ-მინისტრთან ერთად თეთრ წყაროში იმყოფებოდნენ მაჟორიტარობის კანდიდატი ნაციონალური მოძრაობისგან დავით ბეჟუაშვილი და საქართველოს განათლებისა და მეცნიერების მინისტრის პირველი მოადგილე ალექსი ჩიკვაიძე.
საქართველოს მთავრობის კანცელარიის პრესცენტრი