2008 წლის 10 აგვისტოს გაიმართა საქართველოს მთავრობის სხდომა.
სხდომის დაწყებისას საქართველოს პრემიერ-მინისტრმა ვლადიმერ გურგენიძემ აღნიშნა, რომ ქვეყანაში არსებული საომარი ვითარებიდან გამომდინარე, მთავრობის სხდომები ყოველდღიურად გაიმართება. მან თქვა, რომ გასული დღე-ღამის განმავლობაში ჩვენმა სამოქალაქო ინფრასტრუქტურამ გარკვეული მსუბუქი დარტყმები მიიღო. ყველას აინტერესებს, თუ როგორ ხდება მათ მიერ გამოწვეული შედეგების აღმოფხვრა და თხოვა საქართველოს ეკონომიკური განვითარების მინისტრს ეკა შარაშიძეს დამსწრეთ ინფორმირება აღდგენითი სამუშაოების მიმდინარეობის შესახებ.
ეკონომიკური განვითარების მინისტრმა ეკატერინე შარაშიძემ მთავრობის წევრებს მიაწოდა ინფორმაცია, რომ გარკვეული ზიანი მიადგა ფოთის პორტს. მან თქვა, რომ ამ ეტაპზე ჩვენ შევძელით ყველაფრის გამართვა და ამჟამად პორტი შეუფერხებლად მუშაობს. ასევე შეუფერხებლად მუშაობს ბათუმის პორტი, სადაც გუშინ ოთხი გემი ჩამოიტვირთა. სრულად არის მობილიზებული საგზაო დეპარტამენტი. მიღებული ზომების შედეგად საავტომობილო მაგისტრალებზე დაზიანებული ყველა უბანი აღდგენილია. ასევე აღმოფხვრილია დაზიანებები რკინიგზაზე, რომელიც ახლა გამართულად მუშაობს. ფუნქციონირებენ თბილისისა და ბათუმის საერთაშორისო აეროპორტები. ხორციელდება ფრენები ევროპის ქვეყნების მიმართულებით. თბილისის აეროპორტში სრული სიმშვიდეა. ვესტიბიულში დაიდგა დამატებითი სკამები, გაიხსნა დამატებითი მაღაზიები და კაფეები. არანაირი შეფერხება არსად არ არის და ამ ეტაპზე ყველაფერი გამართულად მუშაობს.
საქართველოს პრემიერ-მინისტრმა მადლობა გადაუხადა ეკონომიკური განვითარების მინისტრს გაწეული მუშაობისათვის და აღნიშნა, რომ საჭიროა მაქსიმალურად მობილიზება, რათა დროულად დავეხმაროთ ინფრასტრუქტურის ნებისმიერ საკვანძო ერთეულს, მათ შორის კერძო კომპანიებსაც, და ყურადღება გაამახვილა იმ დახმარებაზე, რომელიც სამინისტრომ გაუწია თბილავიამშენს დაზიანებული საფრენი ბილიკის აღდგენაში.
შემდეგ მან, საქართველოს ენერგეტიკის მინისტრის ალექსანდრე ხეთაგურის მივლინებაში ყოფნის გამო, თხოვა საქართველოს ფინანსთა მინისტრს ნიკა გილაურს ინფორმაციის წარმოდგენა ენერგეტიკის სექტორში არსებული სიტუაციის შესახებ. ასევე, მან განმარტა, რომ არსად, არანაირი პრობლემა არ უნდა შეექმნას გადასახადების გადამხდელებს მომსახურების თვალსაზრისით.
საქართველოს ფინანსთა მინისტრმა ნიკა გილაურმა განაცხადა, რომ ენერგეტიკის სექტორი გამართულად მუშაობს. არავითარი პრობლემა არ გვაქვს ელექტროენერგიისა და გაზმომარაგების მხრივ. არის საკმაოდ დიდი რაოდენობის რეზერვი და შემუშავებულია სხვადასხვა სცენარი. გორში ჩვენ თვითონ შევზღუდეთ გაზის მიწოდება უსაფრთხოების მიზნით. რაც შეეხება ფინანსთა სამინისტროს, განაგრძო მან, მისი ყველა უწყება 24-საათიან რეჟიმში მუშაობს, ჯერჯერობით არანაირი პრობლემა არ არის და ხვალ, ისევე როგორც ეს ნებისმიერ ორშაბათს ხდება, ეკონომიკური აქტივობა განახლდება.
საქართველოს პრემიერ-მინისტრმა ხაზი გაუსვა ასეთ არაორდინალურ ვითარებაში ქვეყნისათვის გადასახადების სრულად გადახდისა და სისტემის გამართულად მუშაობის მნიშვნელობას და აღნიშნა, რომ ეს არის ჩვენი პატრიოტული ვალი.
შემდეგ საქართველოს პრემიერ-მინისტრი დაინტერესდა ჯანმრთელობის დაცვის სისტემის მუშაობით.
საქართველოს შრომის, ჯანმრთელობისა და სოციალური დაცვის მინისტრმა ალექსანდრე კვიტაშვილმა დამსწრეთ მიაწოდა ინფორმაცია, რომ მიმდინარე დღის 14 საათის მდგომარეობით სამინისტროში შემოსულია ინფორმაცია 92 დაღუპულის შესახებ, რომელთაგან 47 სამოქალაქო პირია. გუშინდელთან შედარებით დაღუპულ სამოქალაქო პირთა რაოდენობის ზრდა, თქვა მან, გამოწვეულია გორში განხორციელებული დაბომბვიდან გამომდინარე. გასაოცარია, როდესაც აცხადებენ, რომ არ ბომბავენ სამოქალაქო ობიექტებს და ფაქტობრივად, დიდი რაოდენობით ხალხი დაზიანდა საცხოვრებელ სახლსა და სასწრაფო დახმარების სამედიცინო ობიექტში. მთელი სისტემა დალაგებულად მუშაობს და პრობლემებს ჯერჯერობით ვერ ვხედავთ. უცხოეთიდან არის დიდი რაოდენობით მოთხოვნები ნებისმიერი დახმარების გაწევის შესახებ. ამის კოორდინირებას ჩვენ ვახდენთ გაეროს შესაბამის ორგანიზაციებთან ერთად და ვაცხადებთ, რომ ამ მომენტისათვის მასობრივი დახმარების გაწევის აუცილებლობა არ არის, თუმცა დაინტერესება დიდია.
საქართველოს პრემიერ-მინისტრმა ხაზგასმით აღნიშნა ქვეყნის მედიკოსთა ის თავდადება, რომელსაც ისინი იჩენენ ამ დღეებში, მადლობა გადაუხადა მათ და იმედი გამოხატა, რომ უახლოესი დღეებიდან დაჭრილთა და გარდაცვლილთა რაოდენობის სერიოზული მატება აღარ იქნება. რაც შეეხება ჰუმანიტარული დახმარების საკითხს, თქვა მან, შექმნილი ვითარების გამო გვაქვს მოსახლეობის გარკვეული შემოდინება, ვისაც არ დაედგომება საკუთარ სახლში და თხოვა საქართველოს ლტოლვილთა და განსახლების მინისტრს თამარ მარტიაშვილს დამსწრეთ ინფორმირება მცხეთაში მიმღებ-გამანაწილებელი ცენტრის შექმნის სამუშაოთა მიმდინარეობის შესახებ, არის თუ არა ცენტრი აღჭურვილი პირველადი მოხმარების საგნებით, ასრულებს თუ არა თავის ფუნქციებს და როგორ ართმევს თავს მათ.
საქართველოს ლტოლვილთა და განსახლების მინისტრმა თქვა, რომ დღის ბოლოსათვის ცენტრი მთლიანად იქნება აღჭურვილი. ამჟამად იქ დაახლოებით 130 ადამიანი იმყოფება და ელოდება განაწილებას. ნაკადებს კიდევ ველოდებით, რომელთა რაოდენობა არ ვიცით, თუმცა რამდენიც იქნება მივიღებთ და დავაბინავებთ. თუ იქნა მოთხოვნა, გაიშლება დამატებითი კარვები, რომლებიც შესაბამისად აღიჭურვება. რაც შეეხება ჰუმანიტარულ დახმარებას, განაგრძო მინისტრმა, ხვალ გაეროს ორგანიზაციებიდან ველოდებით სამ თვითმფრინავს. უახლოეს დღეებში მსხვილ ჰუმანიტარულ დახმარებას გვპირდებიან ,,წითელი ჯვარი", სხვა ორგანიზაციები. დღეს საღამოდან პროდუქტებით მომარაგების თვალსაზრისით ფართომასშტაბიან ღონისძიებებს განახორციელებს ,,ჭორლდ ფოოდ"-ი. ყველა დევნილების აღრიცხვას დავიწყებთ ხვალიდან, რადგან ახლა ამის გაკეთება ძალიან რთულია მათი მუდმივი მიგრაციის გამო.
საქართველოს პრემიერ-მინისტრმა მადლობა გადაუხადა ლტოლვილთა და განსახლების მინისტრს მოწოდებული ინფორმაციისათვის და დაინტერესდა იუსტიციის სამინისტროს სისტემაში არსებული მდგომარეობით, კერძოდ, არიან თუ არა სამინისტროს უწყებები მზად მოემსახურონ საქართველოს მოქალაქეებს ყველა რეგიონში, რაიმე საფრთხე ხომ არ შეექმნებათ ადამიანებს.
საქართველოს იუსტიციის მინისტრმა ნიკა გვარამიამ განაცხადა, რომ სისტემის საქმიანობაში არაფერი შეცვლილა, იგი მუშაობს ჩვეულებრივი რიტმით, მოქალაქეების მომსახურება კვლავინდებურად აქტუალურია, რაც სრული მოცულობით განხორციელდება. დღეს რიგ რეგიონებში სამუშაო დღეა და როცა შესაბამისი მოთხოვნა არსებობს, არანაირი სირთულე არ გვაქვს. რაც შეეხება პრობლემურ რეგიონებს, განაგრძო მან, ჯერჯერობით ჩვენ იქ ვმუშაობთ და სავარაუდოდ ვაპირებთ ამ მუშაობის გაგრძელებას. რა თქმა უნდა, გარკვეული საფრთხე არის, მაგრამ სახელისუფლებო სისტემაში დასაქმებული ადამიანები აცნობიერებენ რისკების არსებობის შესაძლებლობას, მით უმეტეს საქართველოს პირობებში მყოფი ქვეყნისათვის, და ჩვენ ვალდებული ვართ მოვემსახუროთ მათ ამ რისკების მიუხედავად. რაც შეეხება პენიტენციალურ სისტემას, აქაც სრული კონტროლია. არანაირი რისკი იმასთან დაკავშირებით, რომ უსაფრთხოების თვალსაზრისით პენიტენციალურ სისტემაში რაიმე მოხდეს და შესაბამისად, მოსახლეობას პრობლემები შეექმნას, არ არსებობს, რადგან ჩვენ სრულად ვაკონტროლებთ სიტუაციას ყველა პენიტენციალურ დაწესებულებაში. სისტემა გამართულად მუშაობს, მისი ყველა უწყება ისევე საქმიანობს, როგორც ყოველთვის მუშაობდა.
საქართველოს პრემიერ-მინისტრმა კმაყოფილება გამოხატა მოწოდებულ ინფორმაციასთან დაკავშირებით და აღნიშნა, რომ შინაგან საქმეთა სამინისტროს სისტემა ასევე გამართულად მუშაობს, ყველგან შენარჩუნებულია საზოგადოებრივი წესრიგი და ამ მხრივ ქვეყანაში პრობლემები არ არის.
შემდეგ პრემიერ-მინისტრი დაინტერესდა, არის თუ არა შეფერხებები კვების პროდუქტების მოწოდების საქმეში ლოგისტიკური ვითარებიდან გამომდინარე, რაზეც საქართველოს სოფლის მეურნეობის მინისტრმა ბაკურ კვეზერელმა თქვა, რომ სურსათით მომარაგების თვალსაზრისით ერთგვარი პრობლემები შეიქმნა, რაც გამოწვეული იყო ხელოვნური პანიკის შედეგად, მაგრამ ახლა მდგომარეობა გამოსწორებულია და სურსათის მიწოდების, წარმოების თუ რეალიზაციის თვალსაზრისით პრობლემები არ არსებობს.
წარმოდგენილ ინფორმაციასთან დაკავშირებით საქართველოს პრემიერ-მინისტრმა აღნიშნა, რომ ძალზე მნიშვნელოვანია სწრაფი რეაგირება თუ ადგილობრივი სატრანსპორტო პრობლემების გამო ხდება შეფერხებები სურსათის მიწოდების საქმეში. ასევე ძალზე მნიშვნელოვანია მჭიდრო კონტაქტები ადგილობრივ თვითმმართველობებთან წარმოქმნილი პრობლემების სწრაფად გადასაწყვეტად, რასაც სოფლის მეურნეობის სამინისტრო აკეთებს.
შემდეგ მან თხოვა საქართველოს განათლებისა და მეცნიერების მინისტრს გიორგი ნოდიას დამსწრეთ ინფორმირება სასწავლო დაწესებულებებში არსებული მდგომარეობის შესახებ.
საქართველოს განათლებისა და მეცნიერების მინისტრმა გიორგი ნოდიამ აღნიშნა, რომ პრობლემები გვაქვს გორში, სადაც დაზიანდა გორის უნივერსიტეტის, ერთ-ერთი ტექნიკუმისა და ორი სკოლის შენობები. განსაკუთრებით დაზიანებულია მე-7 სკოლის შენობა. ხვალ ადგილზე შესწავლილ იქნება თუ რა აღდგენით-სარემონტო სამუშაოებია ჩასატარებელი, რომ სექტემბრისათვის მთელი სასწავლო ინფრასტრუქტურა მზად იყოს.
საქართველოს პრემიერ-მინისტრმა მადლობა გადაუხადა განათლებისა და მეცნიერების მინისტრს მოწოდებული ინფორმაციისათვის და აღნიშნა, რომ სკოლების აღდგენით-სარემონტო სამუშაოებისათვის საჭირო თანხებს აუცილებლად გამოყოფს ფინანსთა სამინისტრო.
შემდეგ იგი დაინტერესდა უცხოეთში მყოფ ქართულ დიასპორასთან მუშაობით, რის შესახებ დიასპორის საკითხებში საქართველოს სახელმწიფო მინისტრმა იულონ გაგოშიძემ თქვა, რომ მუდმივი კონტაქტია ყველა იმ ქვეყანასთან, სადაც არის ქართული დიასპორა. ისინი აქტიურად არიან ჩართული საქართველოს დაცვის საქმეში. დღეს 10 ქალაქში, პარიზში, ვენაში, სტამბულში, ვაშინგტონში, ბერლინში, ათენში, ვარშავაში, ბარსელონაში, კრაკოვში გაიმართა მიტინგები რუსეთის საელჩოებთან და საკონსულოებთან. ჩვენ დაუყოვნებლივ ვაწვდით მათ სათანადო ინფორმაციას აქ მიმდინარე პროცესებზე. თავის მხრივ, დიასპორების წარმომადგენლები ამ ინფორმაციებს განავრცობენ ადგილებზე, რომ რუსეთი ახლა ასევე ეწევა საინფორმაციო ომს და სიყალბეებს ავრცელებს.
საქართველოს პრემიერ-მინისტრმა აღნიშნა, რომ ქართული დიასპორა არის ჩვენი ქვეყნისა და ერის განუყოფელი ნაწილი. ჩვენ კიდევ ერთხელ ვრწმუნდებით მათ მაღალ მოქალაქეობრივ შეგნებაში. ისინი თვალყურს ადევნებენ აქ მიმდინარე პროცესებს, ნერვიულობენ თავიანთ ახლობლებზე, რომ ასე შორს არიან საქართველოდან. აქედან გამომდინარე, მათ ნაკლები ინფორმაცია აქვთ, თუ რა ხდება აქ ყოველ კონკრეტულ მომენტში, რაც კიდევ უფრო ანერვიულებთ. მაგრამ, ვინც აქ არის, ხედავს, რომ სამოქალაქო ცხოვრება ჩვეულებრივ რიტმში გრძელდება საქართველოს მთელ ტერიტორიაზე.
საქართველოს მთავრობის კანცელარიის საორგანიზაციო დეპარტამენტი