2007 წლის 3 ოქტომბერს გაიმართა საქართველოს მთავრობის სხდომა. დღის წესრიგში შეტანილი იყო 21 საკითხი. დღის წესრიგი
სხდომის დაწყებამდე საქართველოს პრემიერ-მინისტრმა ზურაბ ნოღაიდელმა დამსწრეთ აცნობა, რომ დღეისათვის კახეთში მოკრეფილია და ღვინის ქარხნებისათვის გადასამუშავებლად ჩაბარებულია 22 ათასი ტონა ყურძენი, ძირითადად საფერავის ჯიშის. მან თქვა, რომ ორი-სამი დღეა დაიწყო რქაწითელის კრეფა თელავისა და გურჯაანის რაიონებში, რაც რთვლის ძირითად ფაზაში შესვლას ნიშნავს. ამდენად, ახლა განსაკუთრებული ყურადღების გამოჩენაა საჭირო. ამჟამად გურჯაანში იმყოფება საქართველოს სოფლის მეურნეობის მინისტრი პეტრე ცისკარიშვილი, "რთველი-2007"-ის შტაბის უფროსი, რომელიც კოორდინაციას უწევს მოსავლის აღებისა და დაბინავების ყველა სამუშაოს. დღეს გურჯაანში გაიმართება საქართველოს სოფლის მეურნეობის პოლიტიკის შემმუშავებელი სამთავრობო კომისიის სხდომა, სადაც განხილულ იქნება წლევანდელი რთვლის მიმდინარეობა, აგრეთვე დამატებითი ღონისძიებები, რათა მოსავლის აღება უპრობლემოდ და უდანაკარგოდ განხორციელდეს.
საქართველოს მთავრობის კანცელარიის პრესცენტრი