საქართველოს მთავრობის დადგენილება №272
06 დეკემბერი, 2007
2007-2008 სასწავლო წელს უმაღლეს საგანმანათლებლო დაწესებულებებში პროფესიული უმაღლესი განათლების საგანმანათლებლო პროგრამაზე ჩარიცხულ სტუდენტთა სოციალური პროგრამის ფარგლებში დაფინანსების ოდენობისა და პირობების განსაზღვრის შესახებ
მოქალაქეებისათვის, რომლებმაც სრული ზოგადი განათლება მიიღეს აზერბაიჯანულენოვან, სომხურენოვან, კონფლიქტის ზონაში და მაღალმთიან და ეკოლოგიური მიგრა-ციის რეგიონებში არსებულ ზოგადსაგანმანათლებლო დაწესებულებებში, აგრეთვე საქართველოს ტერიტორიული მთლიანობისათვის დაღუპულთა და უგზოუკვლოდ დაკარგულთა შვილების, მრავალშვილიანი ოჯახის წევრების, ობოლი არასრულწლოვნებისა და კომუნისტური რეჟიმის დროს საქართველოდან დეპორტირებული სამცხე-ჯავახეთის მოსახლეობის შთამომავლებისათვის, საქართველოს აკრედიტებულ უმაღლეს საგანმანა-თლებლო დაწესებულებებში პროფესიული უმაღლესი განათლების საგანმანათლებლო პროგრამით განათლების მიღების ხელშეწყობის მიზნით, ,,უმაღლესი განათლების შესახებ" საქართველოს კანონის მე-6 მუხლის პირველი პუნქტის ,,გ" ქვეპუნქტის, 52-ე მუხლის მე-8 პუნქტის, ,,საქართველოს 2007 წლის სახელმწიფო ბიუჯეტის შესახებ" საქართველოს კანონის 49-ე მუხლის შესაბამისად დაფინანსება განხორციელდეს შემდეგი სახით:
მუხლი 1. დაფინანსების ოდენობა
1. 2007-2008 სასწავლო წელს საქართველოს აკრედიტებულ უმაღლეს საგანმანათლებლო დაწესებულებებში (შემდგომში - უმაღლესი საგანმანათლებლო დაწესებულება) ერთიანი ეროვნული გამოცდების შედეგად ჩარიცხულ სტუდენტთა სოციალური პროგრამის ფარგლებში გამოიყოს 260 (ორას სამოცი ათასი) ლარი პროფესიული უმაღლესი განათლების საგანმანათლებლო პროგრამის დასაფინანსებლად სახელმწიფო სასწავლო გრანტებისათვის (შემდგომში - გრანტი).
2. სოციალური პროგრამის ფარგლებში სახელმწიფო დაფინანსება გაიცემა უმაღლესი საგანმანათლებლო დაწესებულების მიერ განსაზღვრული სწავლის საფასურის შესაბამისად საქართველოს მთავრობისაგან დადგენილი სრული გრანტის მაქსიმალური ოდენობის ფარგლებში.
3. იმ შემთხვევაში, თუ სტუდენტი ერთიანი ეროვნული გამოცდების შედეგად მოიპოვებს გრანტის ნაწილობრივ ოდენობას, სოციალური პროგრამის ფარგლებში მისი სწავლის საფასური შეივსება საქართველოს მთავრობის მიერ დადგენილი სრული გრანტის მაქსიმალური ოდენობის ფარგლებში.
მუხლი 2. სტუდენტი
1. სოციალური პროგრამის ფარგლებში დაფინანსება შეიძლება მოიპოვოს მხოლოდ იმ პირმა, რომელიც ერთიანი ეროვნული გამოცდების შედეგად ჩაირიცხა უმაღლეს საგანმანათლებლო დაწესებულებაში პროფესიული უმაღლესი განათლების საგანმანათლებლო პროგრამით და ვერ მოიპოვა სახელმწიფო სასწავლო გრანტი.
2. ამ დადგენილების მიზნებისათვის სტუდენტი არის პირი, რომელმაც ერთიანი ეროვნული გამოცდების ჩაბარების საფუძველზე მოიპოვა უმაღლეს საგანმანათლებლო დაწესებულებაში პროფესიულ უმაღლესი განათლების საგანმანათლებლო პროგრამაზე ჩარიცხვის უფლება. ის აბიტურიენტი, რომელმაც მოიპოვა უმაღლეს საგანმანათლებლო დაწესებულებაში ჩარიცხვის უფლება, მაგრამ კანონმდებლობით დადგენილი წესით არ ჩაირიცხა უმაღლეს საგანმანათლებლო დაწესებულებაში, ამ მუხლის პირველი პუნქტის შესაბამისად ვერ მიიღებს დაფინანსებას სოციალური პროგრამის ფარგლებში.
3. გრანტის მიღების უპირატესობით სარგებლობენ ის სტუდენტები, რომელთა უმაღლეს საგანმანათლებლო დაწესებულებაში ჩარიცხვა განხორციელდა საგანმანათლებლო პროგრამაზე ჩატარებული პირველი კონკურსის შედეგად.
მუხლი 3. სტუდენტთა კატეგორიები
სოციალური პროგრამით გათვალისწინებული თანხა გადაეცემათ შემდეგი კატეგორიის სტუდენტებს:
1. 70 გრანტი იმ სტუდენტებს, რომლებიც ბოლო სამი წლის განმავლობაში სწავლობდნენ და სრული ზოგადი განათლების დამადასტურებელი დოკუმენტი მიიღეს მაღალმთიან და ეკოლოგიური მიგრაციის რეგიონებში არსებულ ზოგადსაგანმანათლებლო დაწესებულებებში, აქედან:
ა) მესტიის მუნიციპალიტეტში - 6 გრანტი;
ბ) ლენტეხის მუნიციპალიტეტში - 4 გრანტი;
გ) ონის მუნიციპალიტეტში - 3 გრანტი;
დ) ქედის მუნიციპალიტეტში - 7 გრანტი;
ე) ხულოს მუნიციპალიტეტში - 13 გრანტი;
ვ) შუახევის მუნიციპალიტეტში - 8 გრანტი;
ზ) ყაზბეგის მუნიციპალიტეტში - 2 გრანტი;
თ) დუშეთის მუნიციპალიტეტში (ბარისახოს, შატილის, ქვეშეთის, მლეთის, მაღარო-სკარისა და გუდამაყრის სკოლებში) - 2 გრანტი;
ი) ადიგენის მუნიციპალიტეტში - 6 გრანტი;
კ) ახალქალაქის მუნიციპალიტეტში - 3 გრანტი;
ლ) ნინოწმინდის მუნიციპალიტეტში - 2 გრანტი;
მ) წალკის მუნიციპალიტეტში - 5 გრანტი;
ნ) დმანისის მუნიციპალიტეტში - 5 გრანტი;
ო) ახმეტის მუნიციპალიტეტში პანკისის ხეობისა და ზემო და ქვემო ალვანის სკოლებში - 4 გრანტი.
2. 60 გრანტი იმ სტუდენტებს, რომლებიც ბოლო სამი წლის განმავლობაში სწავლო-ბდნენ და სრული ზოგადი განათლების დამადასტურებელი დოკუმენტი მიიღეს კონფლიქტის ზონებში არსებულ ზოგადსაგანმანათლებლო დაწესებულებებში, აქედან:
ა) აფხაზეთის ავტონომიურ რესპუბლიკაში - 35 გრანტი;
ბ) ,,დროებითი ადმინისტრაციულ-ტერიტორიული ერთეულის შექმნის შესახებ" საქართველოს პარლამენტის 2007 წლის 8 მაისის N4735 დადგენილებით ყოფილი სამხრეთ ოსეთის ავტონომიური ოლქის ტერიტორიაზე შექმნილ დროებით ადმინისტრაციულ-ტერიტორიულ ერთეულში - 25 გრანტი.
3. 10 გრანტი იმ სტუდენტებს, რომლებიც ბოლო სამი წლის განმავლობაში სწავლობდნენ და სრული ზოგადი განათლების დამადასტურებელი დოკუმენტი მიიღეს აზერბაიჯანულენოვან ზოგადსაგანმანათლებლო დაწესებულებებში.
4. 10 გრანტი იმ სტუდენტებს, რომლებიც ბოლო სამი წლის განმავლობაში სწავლო-ბდნენ და სრული ზოგადი განათლების დამადასტურებელი დოკუმენტი მიიღეს სომხურენოვან ზოგადსაგანმანათლებლო დაწესებულებებში.
5. 15 გრანტი იმ სტუდენტებს, რომლებიც არიან საქართველოს ტერიტორიული მთლიანობისათვის ბრძოლებში დაღუპულთა და უგზოუკვლოდ დაკარგულთა შვილები.
6. 5 გრანტი იმ სტუდენტებს, რომლებიც არიან კომუნისტური რეჟიმის დროს საქართველოდან დეპორტირებული სამცხე-ჯავახეთის მოსახლეობის შთამომავლები.
7. 20 გრანტი იმ სტუდენტებს, რომლებიც არიან ობლები (უდედმამოები) ან მრავალშვილიანი ოჯახის (4 და მეტი შვილით) წევრები და რომელთა ასაკი არ აღემატება 25 წელს.
მუხლი 4. რამდენიმე კატეგორიაში შემავალი სტუდენტები
1. იმ სტუდენტის მონაცემები, რომელიც ერთდროულად განეკუთვნება ამ დადგენილების მე-3 მუხლის პირველი პუნქტის ,,ა - ო" ქვეპუნქტებითა და მე-2 - მე-7 პუნქტებით გათვალისწინებულ რომელიმე კატეგორიას, გრანტის მოსაპოვებლად განიხილება ჯერ მე-3 მუხლის პირველი პუნქტით, ხოლო შემდგომ - მე-3 მუხლის მე-2 - მე-7 პუნქტებით დადგენილი კატეგორიების ფარგლებში.
2. სტუდენტი, რომელიც განეკუთვნება მე-3 მუხლის მე-2 - მე-7 პუნქტებით გათვალისწინებულ ორ ან მეტ კატეგორიას, გრანტს მოიპოვებს ერთ-ერთ კატეგორიაში, რაც უნდა მიუთითოს ამ დადგენილების მე-8 მუხლის მე-3, მე-4 და მე-5 პუნქტებით განსაზღვრულ განცხადებაში.
მუხლი 5. დაფინანსების პრინციპი კონკურსისა და თანაბარი ქულების დროს
1. თუ ამ დადგენილებით გათვალისწინებული კატეგორიის/ქვეკატეგორიის სტუდენტთა რაოდენობა აღემატება გრანტით დასაფინანსებელ სტუდენტთა რაოდენობას (შემდგომში - კონკურსი), თანხა გაიცემა ერთიანი ეროვნული გამოცდების შედეგების აბსოლუტური რანჟირების დოკუმენტის საფუძველზე.
2. თუ ერთიან ეროვნულ გამოცდებზე ზოგადი უნარების გამოცდაში თანაბარი სკალირებული ქულა აქვს ორ ან მეტ სტუდენტს, დაფინანსება გაიცემა ქვემოთ მოცემული კრიტერიუმებით, წარმოდგენილი თანმიმდევრობის დაცვით:
ა) ერთიან ეროვნულ გამოცდებზე ქართული ენისა და ლიტერატურის გამოცდაში მიღებული უფრო მაღალი სკალირებული ქულის შესაბამისად;
ბ) ერთიან ეროვნულ გამოცდებზე უცხო ენის გამოცდაში მიღებული უფრო მაღალი სკალირებული ქულის შესაბამისად.
მუხლი 6. სტუდენტთა დარჩენილი გრანტის გადანაწილება ქვეკატეგორიების მიხედვით
1. თუ მე-3 მუხლის პირველი პუნქტით გათვალისწინებული ქვეკატეგორიის სტუდენტთა რაოდენობა ამ ქვეკატეგორიით დადგენილ გრანტის რაოდენობაზე ნაკლებია, დარჩენილი გრანტის რაოდენობა დაემატება ამ დადგენილების მე-3 მუხლის პირველი პუნქტის ,,ა", ,,ბ", ,,გ", ,,ე", ,,ზ", ,,თ" ქვეპუნქტებით განსაზღვრულ რაოდენობას და გადანაწილდება მე-5 მუხლით დადგენილი პრინციპით.
2. თუ ამ მუხლის პირველი პუნქტით გათვალისწინებული მოქმედების განხორციელების შემდეგ დარჩა მე-3 მუხლის პირველი პუნქტით გათვალისწინებული ქვეკატეგორიის სტუდენტთა გრანტი, იგი დაემატება მე-3 მუხლის პირველი პუნქტით გათვალისწინებულ იმ ქვეკატეგორიას, რომელშიც კონკურსია.
3. თუ მე-3 მუხლის მე-2 პუნქტით გათვალისწინებული ქვეკატეგორიის სტუდენტთა რაოდენობა ნაკლებია ამ ქვეკატეგორიით დადგენილ გრანტის რაოდენობაზე, დარჩენილი გრანტის რაოდენობა დაემატება მე-3 მუხლის მე-2 პუნქტის სხვა ქვეკატეგორიას და გადანაწილდება მე-5 მუხლით დადგენილი პრინციპით.
მუხლი 7. დარჩენილი თანხის გადანაწილება კატეგორიების მიხედვით
1. თუ ამ დადგენილებით გათვალისწინებული თანხა სრულად არ გაიცა მე-3 მუხლით გათვალისწინებული კატეგორიის მიხედვით, მე-5 მუხლით დადგენილი პრინციპის შესაბამისად იგი გადაუნაწილდებათ კატეგორიების მიხედვით შემდეგი თანამიმდევრობით:
ა) მე-3 მუხლის მე-5 პუნქტით გათვალისწინებული კატეგორიის მიხედვით კონკურსის შემთხვევაში;
ბ) 2006-2007 სასწავლო წელს ერთიანი ეროვნული გამოცდების შედეგად ჩარიცხულ სტუდენტებს (საქართველოს ტერიტორიული მთლიანობისათვის ბრძოლაში დაღუპულთა და უგზო-უკვლოდ დაკარგულთა შვილებს), რომლებმაც ვერ მოიპოვეს სრული სახელმწიფო სასწავლო გრანტი ან მოიპოვეს სახელმწიფო სასწავლო გრანტის ნაწილობრივი ოდენობა, მათ შორის 2006-2007 სასწავლო წლის სოციალური პროგრამის დაფინანსების ფარგლებში;
გ) 2005-2006 სასწავლო წელს ერთიანი ეროვნული გამოცდების შედეგად ჩარიცხულ სტუდენტებს (საქართველოს ტერიტორიული მთლიანობისათვის ბრძოლაში დაღუპულთა და უგზო-უკვლოდ დაკარგულთა შვილებს), რომლებმაც ვერ მოიპოვეს სრული სახელმწიფო სასწავლო გრანტი ან მოიპოვეს სახელმწიფო სასწავლო გრანტის ნაწილობრივი ოდენობა, მათ შორის 2005-2006 სასწავლო წლის სოციალური პროგრამის დაფინანსების ფარგლებში;
დ) მე-3 მუხლის მე-7 პუნქტით გათვალისწინებული კატეგორიის მიხედვით კონკურსის შემთხვევაში;
ე) მე-3 მუხლის მე-2 პუნქტით გათვალისწინებული კატეგორიის მიხედვით კონკურსის შემთხვევაში.
2. თუ ამ მუხლის პირველი პუნქტით გათვალისწინებული მოქმედების განხორციელების შემდეგ ამ დადგენილებით განსაზღვრული თანხა სრულად არ გაიცა, დარჩენილი თანხა მე-5 მუხლით დადგენილი პრინციპის მიხედვით გადაუნაწილდებათ ამ დადგენილებით გათვალისწინებული კატეგორიების შესაბამის სტუდენტებს, რომელთა ოჯახები რეგისტრირებული არიან სოციალურად დაუცველი ოჯახების მონაცემთა ერთიან ბაზაში, ამ ოჯახების სიღარიბის დონის (რეიტინგული ქულის) გათვალისწინებით.
3. თუ ამ მუხლის პირველი და მე-2 პუნქტებით გათვალისწინებული მოქმედების განხორციელების შემდეგ ამ დადგენილებით განსაზღვრული თანხა სრულად არ გაიცა, დარჩენილი თანხა მე-5 მუხლით დადგენილი პრინციპის მიხედვით გადაუნაწილდებათ ამ დადგენილების მე-3 მუხლის პირველი პუნქტით გათვალისწინებული კატეგორიების სტუდენტებს.
მუხლი 8. განცხადების წარდგენა
1. სოციალური პროგრამის ფარგლებში სახელმწიფო დაფინანსება განხორციელდება საქართველოს განათლებისა და მეცნიერების მინისტრის ინდივიდუალური ადმინისტრაციულ-სამართლებრივი აქტით დამტკიცებული ნუსხით გათვალისწინებული დოკუმენტების წარდგენის შემთხვევაში. ვადას ადგენს საქართველოს განათლებისა და მეცნიერების მინისტრი ინდივიდუალური ადმინისტრაციულ-სამართლებრივი აქტით.
2. მე-3 მუხლის პირველი პუნქტით გათვალისწინებული სტუდენტების დაფინანსება განხორციელდება აბიტურიენტის მიერ შესაბამისი ტერიტორიული ერთეულის ერთიანი ეროვნული გამოცდების სარეგისტრაციო პუნქტებში რეგისტრაციისას წარდგენილი ინფორმაციის საფუძველზე.
3. მე-3 მუხლის პირველი პუნქტის ,,ა - ო" ქვეპუნქტებით გათვალისწინებული სტუდენტები, რომლებიც არ გაივლიან რეგისტრაციას შესაბამისი ტერიტორიული ერთეულის ერთიანი ეროვნული გამოცდების სარეგისტრაციო პუნქტში, აგრეთვე მე-3 მუხლის მე-3 - მე-7 პუნქტებით, მე-7 მუხლის პირველი პუნქტის ,,ბ", ,,გ" ქვეპუნქტებით და მე-2 პუნქტით გათვალისწინებული სტუდენტები, სოციალური პროგრამის ფარგლებში დაფინანსების მისაღებად საქართველოს განათლებისა და მეცნიერების სამინისტროში წარადგენენ განცხადებას.
4. მე-3 მუხლის მე-2 პუნქტის ,,ა" ქვეპუნქტით გათვალისწინებული სტუდენტები სოციალური პროგრამის ფარგლებში დაფინანსების მისაღებად განცხადებას თანდართულ დოკუმენტებთან ერთად წარადგენენ აფხაზეთის ავტონომიური რესპუბლიკის განათლებისა და კულტურის სამინისტროში. აფხაზეთის ავტონომიური რესპუბლიკის განათლებისა და კულტურის სამინისტრო დაადგენს და საქართველოს განათლებისა და მეცნიერების სამინისტროს წარუდგენს სტუდენტებისაგან მიღებული დოკუმენტების შესაბამისობას ამ დადგენილებით განსაზღვრულ პირობებთან.
5. მე-3 მუხლის მე-2 პუნქტის ,,ბ" ქვეპუნქტით გათვალისწინებული სტუდენტები სოციალური პროგრამის ფარგლებში დაფინანსების მისაღებად განცხადებას, თანდართულ დოკუმენტებთან ერთად წარადგენენ ყოფილი სამხრეთ ოსეთის ავტონომიური ოლქის ტერიტორიაზე დროებითი ადმინისტრაციულ-ტერიტორიული ერთეულის ადმინისტრაციაში. ყოფილი სამხრეთ ოსეთის ავტონომიური ოლქის ტერიტორიაზე დროებითი ადმინისტრაციულ-ტერიტორიული ერთეულის ადმინისტრაცია დაადგენს და საქართველოს განათლებისა და მეცნიერების სამინისტროს წარუდგენს სტუდენტებისაგან მიღებული დოკუმენტების შესაბამისობას ამ დადგენილებით განსაზღვრულ პირობებთან.
მუხლი 9. გადაწყვეტილება დაფინანსების მინიჭების შესახებ
გრანტის მინიჭების შესახებ გადაწყვეტილებას აფორმებს საქართველოს განათლებისა და მეცნიერების მინისტრი ინდივიდუალური ადმინისტრაციულ-სამართლებრივი აქტით.
მუხლი 10. დასკვნითი დებულება
დადგენილება ამოქმედდეს ,,უმაღლესი განათლების შესახებ" საქართველოს კანონში ცვლილებების შეტანის შესახებ" საქართველოს კანონის ძალაში შესვლის დღიდან.
ვიცე-პრემიერი გიორგი ბარამიძე