საქართველოს მთავრობის დადგენილება №255
21 ნოემბერი, 2007
მოსახლეობის სათბობი შეშით უზრუნველყოფის ღონისძიებათა შესახებ
,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ" საქართველოს კანონის მე-5 მუხლის შესაბამისად მოსახლეობის სათბობი შეშით მომარაგებისა და მათი სოციალური მდგომარეობის გაუმჯობესების მიზნით:
1. საქართველოს გარემოს დაცვისა და ბუნებრივი რესურსების სამინისტრომ (დ. ჩანტლაძე) უზრუნველყოს 920 000 (ცხრაას ოცი ათასი) ცალი სათბობი შეშის ვაუჩერის დამზადება.
2. თითოეული ვაუჩერის ნომინალი განისაზღვროს 5 მ3 -ით.
3. საქართველოს ადმინისტრაციულ-ტერიტორიული ერთეულების მიხედვით (ქალა-ქების თბილისის, რუსთავის, ქუთაისის, ბათუმისა და ფოთის გარდა) თითოეულ ოჯახს (შემდგომში - ბენეფიციარი) გადაეცეს მხოლოდ ერთი ვაუჩერი.
4. დამტკიცდეს ვაუჩერის ფორმა N1 დანართის მიხედვით.
5. საქართველოს მთავრობის კანცელარიის რეგიონალურ საკითხთა დეპარტამენტმა (ჯ. ბაკურაძე) უზრუნველყოს მუნიციპალიტეტებისა და მათში შემავალი დასახლებული პუნქტების (ბენეფიციარების) რაოდენობის შესახებ ინფორმაციის მიწოდება საქართველოს გარემოს დაცვისა და ბუნებრივი რესურსების სამინისტროსათვის.
6. საქართველოს გარემოს დაცვისა და ბუნებრივი რესურსების სამინისტრომ განახორციელოს ბენეფიციარებისათვის ვაუჩერის გადაცემის ღონისძიებანი.
7. საქართველოს გარემოს დაცვისა და ბუნებრივი რესურსების სამინისტროს მიერ ამ დადგენილების მე-6 პუნქტით განსაზღვრული ღონისძიების განხორციელებაზე არ გავრცელდეს ,,საქართველოს 2007 წლის სახელმწიფო ბიუჯეტის შესახებ" საქართველოს კანონის მე-8 მუხლით განსაზღვრული შეზღუდვა.
8. საქართველოს გარემოს დაცვისა და ბუნებრივი რესურსების სამინისტრომ ამ განკარგულების მე-7 პუნქტის თანახმად განსაზღვროს იმ პირთა რაოდენობა, რომლებიც შესაბამისი ანაზღაურებით გადასცემენ ვაუჩერებს ბენეფიციარებს.
9. ბენეფიციარის მიერ ვაუჩერის წარდგენა და სათბობი შეშის მოპოვების უფლების მიღება განხორციელდეს შემდეგი ფორმით:
ა) ბენეფიციარი ვაუჩერს წარუდგენს შესაბამისად საქართველოს გარემოს დაცვისა და ბუნებრივი რესურსების სამინისტროს სახელმწიფო საქვეუწყებო დაწესებულების - სატყეო დეპარტამენტის რეინჯერს, დაცული ტერიტორიების დეპარტამენტის დაცული ტერიტორიების ადმინისტრაციის დაცვის სამსახურის უფროსს და უბნის უფროსს (მათ შორის სამინისტროს სისტემაში საჯარო სამართლის იურიდიული პირის სტატუსით არსებული, შესაბამისი დაცული ტერიტორიების ადმინისტრაციების/დირექციების დაცვის სამსახურის უფროსს და უბნის უფროსს), აფხაზეთის ავტონომიური რესპუბლიკის მთავრობის გარემოს დაცვისა და ბუნებრივი რესურსების დეპარტამენტის საქვეუეწყებო დაწესებულების - სატყეო სამმართველოს უფლებამოსილ პირს და აჭარის ავტონომიური რესპუბლიკის მთავრობის საქვეუწყებო დაწესებულების - გარემოს დაცვისა და ბუნებრივი რესურსების სამმართველოს უფლებამოსილ პირს;
ბ) ბენეფიციარის მიერ ვაუჩერის წარდგენის შემდგომ ამ პუნქტის ,,ა" ქვეპუნქტით გათვალისწინებული პირი, ბენეფიციარის მოთხოვნის მიხედვით უზრუნველყოფს საშეშე მერქნის გამოყოფას (მონიშვნას) და აღრიცხვას;
გ) ბენეფიციარის მიერ საშეშე მერქნის დამზადების შემდგომ ამ პუნქტის ,,ა" ქვეპუნქტით გათვალისწინებული პირი უზრუნველყოფს ,,საშეშე მერქნის კანონიერების დამადასტურებელი დოკუმენტის" გაცემას, რომელიც არის ბენეფიციარის მიერ საშეშე მერქნის კანონიერად მოპოვების დამადასტურებელი აუცილებელი და საკმარისი დოკუმენტი.
10. ამ დადგენილების მე-9 პუნქტის ,,ა" ქვეპუნქტით გათვალისწინებული პირები ყოველთვიურად გადასცემენ საქართველოს გარემოს დაცვისა და ბუნებრივი რესურსების სამინისტროს ინფორმაციას განაღდებული ვაუჩერების შესახებ (საშეშე მერქნის სახეობის, მოცულობისა და იმ ადმინისტრაციულ-ტერიტორიული ერთეულის მითითებით, სადაც განხორციელდა ვაუჩერის განაღდება).
11. საქართველოს გარემოს დაცვისა და ბუნებრივი რესურსების სამინისტრომ მე-10 პუნქტში მითითებული ინფორმაციის საფუძველზე უზრუნველყოს საშეშე მერქნისა-თვის ,,ბუნებრივი რესურსებით სარგებლობისათვის მოსაკრებლების შესახებ" საქართველოს კანონით განსაზღვრული ბუნებრივი რესურსებით სარგებლობის მოსაკრებლის ჩარიცხვა შესაბამის ადგილობრივ ბიუჯეტში.
12. საქართველოს ფინანსთა სამინისტრომ (ნ. გილაური):
ა) ამ დადგენილებით გათვალისწინებული ,,ბუნებრივი რესურსებით სარგებლო-ბისათვის მოსაკრებლების შესახებ" საქართველოს კანონით საშეშე მერქნისათვის დადგენილი ბუნებრივი რესურსით სარგებლობის მოსაკრებლის შესაბამის ადგილობრივ ბიუჯეტებში ჩარიცხვის მიზნით, საქართველოს გარემოს დაცვისა და ბუნებრივი რესურსების სამინისტროს ,,საქართველოს 2007 წლის სახელმწიფო ბიუჯეტის შესახებ" საქართველოს კანონის 42-ე მუხლის მე-9 პუნქტით ,,საქართველოს რეგიონებში განსახორციელებელი პროექტებისათვის" გათვალისწინებული ასიგნებებიდან გამოუყოს 2 000 000 (ორი მილიონი) ლარი;
ბ) საქართველოს გარემოს დაცვისა და ბუნებრივი რესურსების სამინისტროს მიერ წარდგენილი წინადადებების საფუძველზე შეიტანოს შესაბამისი ცვლილებები საქართვე-ლოს 2007 წლის სახელმწიფო ბიუჯეტის კვარტალურ განწერაში.
13. საქართველოს ფინანსთა სამინისტრომ და გარემოს დაცვისა და ბუნებრივი რესურსების სამინისტრომ 2008-2011 წლების სახელმწიფო ბიუჯეტების ფორმირებისას ამ დადგენილების მე-11 პუნქტით განსაზღვრული ღონისძიების შესასრულებლად უზრუნველყონ შესაბამისი ასიგნებების გათვალისწინება წლიურ საბიუჯეტო კანონებში.
14. ,,სახელმწიფო შესყიდვების შესახებ" საქართველოს კანონის მე-10 მუხლის მე-3 პუნქტის ,,ე" ქვეპუნქტის შესაბამისად ამ დადგენილებით გათვალისწინებულ ღონისძიებათა შეზღუდულ ვადებში შესასრულებლად საქართველოს გარემოს დაცვისა და ბუნებრივი რესურსების სამინისტრომ საჭირო მომსახურების, საქონლის ან/და სამუშაოთა შესყიდვა განახორციელოს ერთ პირთან მოლაპარაკების საშუალებით.
15. საქართველოს გარემოს დაცვისა და ბუნებრივი რესურსების სამინისტრომ უზრუნველყოს მოსახლეობის ინფორმირება ამ დადგენილებით გათვალისწინებული ღონისძიებებისა და სათბობი შეშის მოპოვებისათვის არსებული პროცედურების შესახებ.
16. ეთხოვოთ აფხაზეთისა და აჭარის ავტონომიური რესპუბლიკების მთავრობებს განახორციელონ ამ დადგენილებით გათვალისწინებული მოსახლეობის სათბობი მერქნით უზრუნველყოფის ღონისძიებანი შესაბამის ტერიტორიებზე.
17. დადგენილება ამოქმედდეს 2007 წლის 14 ნოემბრიდან და ძალაშია 2012 წლის პირველ იანვრამდე.
ვიცე-პრემიერი გიორგი ბარამიძე