საქართველოს მთავრობის დადგენილება №253
15 ნოემბერი, 2007
საჯარო სამართლის იურიდიული პირის - განსაკუთრებით საშიში ინფექციების გამომწვევთა აღმოჩენის, ეპიდზედამხედველობისა და რეაგირების ერთიანი ლაბორატორიის შექმნის შესახებ
,,საზოგადოებრივი ჯანდაცვის შესახებ" საქართველოს კანონის 21-ე მუხლის თანახმად:
1. შეიქმნას საჯარო სამართლის იურიდიული პირი - განსაკუთრებით საშიში ინფექ-ციების გამომწვევთა აღმოჩენის, ეპიდზედამხედველობისა და რეაგირების ერთიანი ლაბორატორია (შემდგომში - ერთიანი ლაბორატორია).
2. საქართველოს შრომის, ჯანმრთელობისა და სოციალური დაცვის სამინისტრომ და სოფლის მეურნეობის სამინისტრომ უზრუნველყონ:
ა) სამინისტროების სისტემაში არსებული და მშენებარე ლაბორატორიების ძირითადი საშუალებებისა და სასაქონლო-მატერიალურ ფასეულობათა განსაზღვრა;
ბ) ერთიანი ლაბორატორიის დებულების შემუშავება და საქართველოს მთავრობისათვის დასამტკიცებლად წარდგენა;
გ) თავიანთი კომპეტენციის ფარგლებში შესაბამისი სამართლებრივი ბაზის სრულყოფა 2008 წლის პირველ იანვრამდე.
3. საქართველოს ეკონომიკური განვითარების სამინისტრომ უზრუნველყოს შრომის, ჯანმრთელობისა და სოციალური დაცვის სამინისტროსა და სოფლის მეურნეობის სამინისტროს მიერ ამ დადგენილების მე-2 პუნქტის «ა» ქვეპუნქტით განსაზღვრული ქონების გადაცემა ერთიანი ლაბორატორიისათვის.
4. საქართველოს ფინანსთა სამინისტრომ (ნ. გილაური) უზრუნველყოს ერთიანი ლაბორატორიის ხარჯის 2008 წლის საქართველოს სახელმწიფო ბიუჯეტის პროექტში გათვალისწინება.
5. განსაკუთრებით საშიში ინფექციების გამომწვევთა აღმოჩენის, ეპიდზედამხედველობისა და რეაგირების ერთიანი ლაბორატორიის სახელმწიფო კონტროლი, რაც გული-სხმობს მის მიერ განხორციელებული საქმიანობის კანონიერების, მიზანშეწონილობის, ეფექტიანობისა და საფინანსო-ეკონომიკური საქმიანობის ზედამხედველობას, განახორციელონ საქართველოს შრომის, ჯანმრთელობისა და სოციალური დაცვის სამინისტრომ და სოფლის მეურნეობის სამინისტრომ.
6. განსაკუთრებით საშიში ინფექციების გამომწვევთა აღმოჩენის, ეპიდზედამხედვე-ლობისა და რეაგირების ერთიანი ლაბორატორიული სისტემის მართვას ახორციელებს საკოორდინაციო საბჭო.
7. დადგენილება ამოქმედდეს გამოქვეყნებისთანავე, გარდა პირველი პუნქტისა.
8. დადგენილების პირველი პუნქტი ამოქმედდეს 2008 წლის პირველ იანვარს.
პრემიერ-მინისტრი ზურაბ ნოღაიდელი