საქართველოს მთავრობის დადგენილება N200
03 ნოემბერი, 2006
,,საქართველოს სოფლის მეურნეობის სამინისტროს დებულების დამტკიცების შესახებ" საქართველოს მთავრობის 2004 წლის 21 მაისის N38 დადგენილებაში ცვლილებებისა და დამატებების შეტანის თაობაზე
მუხლი 1. ,,ნორმატიული აქტების შესახებ" საქართველოს კანონის 36-ე მუხლისა და ,,საქართველოს მთავრობის სტუქტურის, უფლებამოსილებისა და საქმიანობის წესის შესახებ" საქართველოს კანონის მე-17 მუხლის პირველი პუნქტის შესაბამისად ,,საქართველოს სოფლის მეურნეობის სამინისტროს დებულების დამტკიცების შესახებ" საქართველოს მთავრობის 2004 წლის 21 მაისის N38 დადგენილებაში (სსმ, 2004 წელი, N54, მუხლი 461) შეტანილ იქნეს შემდეგი ცვლილებები და დამატებები:
1. დებულების მე-4 მუხლის მე-11 პუნქტი ჩამოყალიბდეს შემდეგი რედაქციით:
,,11. მინისტრს ჰყავს სამი მოადგილე, მათ შორის, ერთი პირველი, რომელთა უფლებამოსილებანი განისაზღვრება მინისტრის ბრძანებით.".
2. დებულების მე-6 მუხლის ,,ა.ბ", ,,ა.ე" და ,,ა.ზ" ქვეპუნქტები ამოღებულ იქნეს.
3. მე-6 მუხლის პირველი პუნქტის ,,ა.ვ" ქვეპუნქტი ჩამოყალიბდეს შემდეგი რედაქციით:
,,ა.ვ) სამინისტროს ცენტრალური აპარატის საქმისწარმოების ორგანიზება და არქივის წარმოება; სხვადასხვა სახელმწიფო უწყებიდან, ფიზიკური და იურიდიული პირებისაგან შემოსული კორესპონდენციების, აგრეთვე სხვა საკონტროლო დავალების შესრულების ანალიზი და კონტროლი;".
4. მე-6 მუხლის ,,დ"ქვეპუნქტი ჩამოყალიბდეს შემდეგი რედაქციით:
,,დ) სოფლის მეურნეობის განვითარების დეპარტამენტი, რომლის ძირითადი ფუნქციაა სასოფლო-სამეურნეო ინფრასტრუქტურის განვითარებისა და საკონსულტაციო უზრუნველყოფის ხელშეწყობა; მიწის კონსოლიდაციის, ნიადაგის ხარისხობრივი შეფასებისა (ნიადაგის ატლასები) და მათი მდგომარეობის თაობაზე ერთიანი ბანკის შექმნის, მიწის რაციონალურად გამოყენების, ნაყოფიერების აღდგენისა და შენარჩუნების, სასოფლო-სამეურნეო დანიშნულების მიწების კატეგორიების შეცვლის ორგანიზება; საქართველოში თევზის მეურნეობის განვითარების ერთიანი სახელმწიფო პოლიტიკის შემუშავებასა და პრიორიტეტულ მიმართულებათა განსაზღვრაში მონაწილეობა; სანაშენე მეცხოველეობის განვითარების ხელშეწყობა; მემცენარეობისა და მეთესლეობის, აგროქიმიისა და სასოფლო-სამეურნეო ტექნოლოგიების სფეროების ერთიანი სახელმწიფო პოლიტიკის შემუშავება;".
5. მე-6 მუხლის ,,ე" ქვეპუნქტი ჩამოყალიბდეს შემდეგი რედაქციით:
,,ე) სასურსათო უსაფრთხოების დეპარტამენტი, რომლის ძირითადი ფუნქციაა ქვეყანაში სურსათის უვნებლობისა და ხარისხის უზრუნველყოფის პოლიტიკის შემუშავება და მისი განხორციელების კონტროლი; სურსათის უვნებლობასთან დაკავშირებული რისკის შეფასება და ანალიზი, კრიზისული მდგომარეობის მართვის ორგანიზება; სურსათის უვნებლობის სამართლებრივი უზრუნველყოფა; ვეტერინარიისა და მცენარეთა დაცვის პოლიტიკის შემუშავება და მისი განხორციელების კოორდინაცია;".
6. მე-6 მუხლს დაემატოს შემდეგი შინაარსის ,,ვ-ი" ქვეპუნქტები:
,,ვ) იურიდიული დეპარტამენტი, რომლის ძირითადი ფუნქციაა სამინისტროს უზრუნველყოფა იურიდიული მომსახურებით, სამინისტროში მომზადებული დოკუმენტაციის სამართლებრივი ექსპერტიზა კომპეტენციის ფარგლებში, სამინისტროს ინტერესების დაცვა სასამართლოში, სამინისტროში კანონშემოქმედებითი საქმიანობისა და პარლამენტთან ურთიერთობის წარმართვის უზრუნველყოფა; სამინისტროს მუშაკთა პირადი საქმეების წარმოება, მათი ატესტაციის ორგანიზება; პერსონალური ხასიათის ბრძანებების მომზადება და რეგისტრაცია; სამინისტროს მიერ ნაკისრი სახელშეკრულებო ვალდებულებების ანალიზი და მონიტორინგი;
ზ) მდგრადი განვითარების პოლიტიკის სამმართველო, რომლის ძირითადი ფუნქციაა სამინისტროს საქმიანობის პრიორიტეტებისა და მიმართულებების განსაზღვრა; სოფლის მეურნეობის ძირითადი მიმართულებების მიზნობრივი პროგრამებისა და პროექტების შემუშავებაში მონაწილეობის მიღება; სამინისტროს სტრატეგიული ხასიათის პროგრამებისა და მოქმედებათა გეგმების შესრულების ეფექტიანობის ანალიზი და შეფასება, შესაბამისი რეკომენდაციების შემუშავება; ანალიზის საფუძველზე სამინისტროს ხელმძღვანელობისათვის განსახორციელებელი სტრუქტურული და დარგობრივი რეფორმების შესახებ წინადადებების წარდგენა და კოორდინაცია;
თ) საფინანსო და საბუღალტრო სამსახური, რომლის ძირითადი ფუნქციაა სამინისტროს საფინანსო-საბიუჯეტო ურთიერთობის წარმართვა, სამინისტროს ერთიანი ბიუჯეტის პროექტის შემუშავება, სამინისტროსათვის გამოყოფილი თანხის მიზნობრივი ათვისების კონტროლი, საბიუჯეტო დაფინანსების სისტემური ანალიზი, პროგრამებისა და პროექტების დაფინანსების პირობების სრულყოფა; სამინისტროს ცენტრალური აპარატის საბუღალტრო აღრიცხვის წარმოება, სამინისტროს სისტემის დაწესებულებათა მიერ წარმოდგენილი კვარტალური და წლიური ანგარიშების სისწორის კონტროლი, ნაერთი ბალანსის მომზადება, საქართველოს ფინანსთა სამინისტროს საგადასახადო დეპარტამენტსა და სხვა ორგანიზაციათა წინაშე სავალდებულო ანგარიშგება, სამინისტროსა და მისი სისტემის დაწესებულებათა საბუღალტრო აღრიცხვისა და ანგარიშგების წარმოების ერთიანი მეთოდოლოგიური საფუძვლების უზრუნველყოფა;
ი) სამელიორაციო პოლიტიკის სამმართველო, რომლის ძირითადი ფუნქციაა ქვეყნის სამელიორაციო პოლიტიკის შემუშავება და მისი განხორციელების კონტროლი;".
მუხლი 2. დადგენილება ამოქმედდეს გამოქვეყნებისთანავე.
პრემიერ-მინისტრი ზურაბ ნოღაიდელი