საქართველოს მთავრობის განკარგულება N511
03 ნოემბერი, 2006
საქართველოს ზოგიერთ სამთავრობო და სხვა სახელმწიფო დაწესებულებათა ,,ერთიანი სამთავრობო ქსელის" შექმნის ღონისძიებათა შესახებ
საქართველოს ზოგიერთ სამთავრობო და სხვა სახელმწიფო დაწესებულებათა ,,ერთიანი სამთავრობო ქსელის" შექმნასთან დაკავშირებით განსახორციელებელ ღონისძიებათა კოორდინაციის მიზნით:
1. შეიქმნას სამთავრობო კომისია (შემდგომში - კომისია) შემდეგი შემადგენლობით:
კახა ბენდუქიძე - რეფორმების კოორდინაციის საკითხებში საქართველოს სახელმწიფო მინისტრი, კომისიის თავმჯდომარე
გიორგი ახალაია - რეფორმების კოორდინაციის საკითხებში საქართველოს სახელმწიფო მინისტრის აპარატის მთავარი სპეციალისტი
ივანე გოჩიტაშვილი - საქართველოს ეკონომიკური განვითარების სამინისტროს კავშირგაბმულობისა და საინფორმაციო ტექნოლოგიების დეპარტამენტის უფროსი
ზაზა იტრიაშვილი - საქართველოს იუსტიციის სამინისტროს ინფორმაციული ტექნოლოგიებისა და კომუნიკაციების სამსახურის უფროსი
ზურაბ კოტარია - საქართველოს შინაგან საქმეთა სამინისტროს ოპერატიულ-ტექნიკური დეპარტამენტის უფროსი
ილია მაღალაშვილი - ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატის უფროსი
ვარლამ ტყეშელაშვილი - საქართველოს პრეზიდენტის ადმინისტრაციის მთავარი კონსულტანტი
გიგა უმეკაშვილი - საქართველოს მთავრობის კანცელარიის საინფორმაციო ტექნოლოგიების დეპარტამენტის უფროსი
დიმიტრი ღლონტი - საქართველოს გარემოს დაცვისა და ბუნებრივი რესურსების სამინისტროს გარემოს დაცვის ინსპექციის ანალიტიკური სამსახურის უფროსი
ეკა ყუბუსიძე - საქართველოს ეკონომიკური განვითარების სამინისტროს კავშირგაბმულობისა და საინფორმაციო ტექნოლოგიების დეპარტამენტის უფროსი სპეციალისტი, კომისიის მდივანი
გიორგი შუბითიძე - საქართველოს განათლებისა და მეცნიერების სამინისტროს ფონდ ,,ირმის ნახტომის" პროგრამის მენეჯერი
დავით ცეკვავა - საქართველოს ფინანსთა სამინისტროს საინფორმაციო-ანალიტიკური დეპარტამენტის უფროსი
დავით წიკლაური - საქართველოს ეკონომიკური განვითარების მინისტრის მოადგილე
მიხეილ ჯანიაშვილი - საქართველოს შრომის, ჯანმრთელობისა და სოციალური დაცვის სამინისტროს ინფორმატიკის სამმართველოს უფროსი.
2. კომისიის:
ა) სხდომები მოიწვევა კომისიის თავმჯდომარის ან კომისიის წევრთა ერთი მესამედის გადაწყვეტილებით;
ბ) სხდომა უფლებამოსილია, თუ მას ესწრება კომისიის წევრთა ორი მესამედი მაინც;
გ) სხდომაზე გადაწყვეტილება მიიღება დამსწრე წევრთა ხმების უმრავლესობით; ხმების თანაბრად გაყოფის შემთხვევაში გადამწყვეტია კომისიის თავმჯდომარის ხმა.
3. ერთიან სამთავრობო ქსელში ჩაერთვება შემდეგი დაწესებულებები:
ა) საქართველოს ფინანსთა სამინისტრო;
ბ) საქართელოს იუსტიციის სამინისტრო;
გ) საქართველოს შინაგან საქმეთა სამინისტრო;
დ) საქართველოს შრომის, ჯანმრთელობისა და სოციალური დაცვის სამინისტრო;
ე) საქართველოს განათლებისა და მეცნიერების სამინისტრო;
ვ) საქართველოს ეკონომიკური განვითარების სამინისტრო;
ზ) საქართველოს გარემოს დაცვისა და ბუნებრივი რესურსების სამინისტრო;
თ) საქართველოს ცენტრალური საარჩევნო კომისია;
ი) საქართველოს სამთავრობო და სახელმწიფო დაწესებულებები.
4. კომისიამ საქართველოს მთავრობისათვის უზრუნველყოს საქართველოს ზოგიერთ სამთავრობო და სხვა სახელმწიფო დაწესებულებათა ,,ერთიანი სამთავრობო ქსელის" შექმნის მიზნით რეკომენდაციის მომზადება კომპანიის შერჩევის თაობაზე, რომელიც გამოთქვამს სურვილს და იკისრებს ვალდებულებას განახორციელოს:
ა) ,,ერთიანი სამთავრობო ქსელის" შექმნა და მასში ამ განკარგულების მე-3 პუნქტით გათვალისწინებული სამთავრობო დაწესებულებების საჭიროებისამებრ ჩართვის უზრუნველყოფა სულ ბევრი ხუთი წლის ვადით, ამავე პერიოდში ქსელის გამართული საქმიანობისათვის საჭირო ტექნიკური და მასთან დაკავშირებული სხვა სახის მომსახურება;
ბ) კომპანია ,,ცისკოს" მიერ ,,ერთიანი სამთავრობო ქსელის" შესაქმნელად გრანტით გადაცემული აპარატურის ინსტალაცია.
5. ამ განკარგულების მე-3 პუნქტით გათვალისწინებულ სამთავრობო და სხვა სახელმწიფო დაწესებულებებს მიეცეთ რეკომენდაცია დადგენილი წესით უზრუნველყონ შერჩეულ კომპანიასთან არა უმეტეს ხუთწლიანი შესყიდვის ხელშეკრულების გაფორმება მათთვის საჭირო და სასურველი მომსახურების პაკეტის მისაღებად.
6. კომისიის საქმიანობის ორგანიზაციული უზრუნველყოფა განახორციელოს რეფორმების კოორდინაციის საკითხებში საქართველოს სახელმწიფო მინისტრის აპარატმა.
7. განკარგულება ძალაშია ხელმოწერის დღიდან.
პრემიერ-მინისტრი ზურაბ ნოღაიდელი